iklan

HEADLINE, SEGURANSA

Kazu mate iha sela polísia, PNTL fó suspensaun preventiva ba membru na’in-8

Kazu mate iha sela polísia, PNTL fó suspensaun preventiva ba membru na’in-8

Deskonfia joven ida ho insiál JB tara-aan iha sela detensaun Komandu PNTL Dili. Imajen/Natalino Costa.

DIILI, 05 setembru 2022 (TATOLI)—Polísia Nasionál Timor-Leste (PNTL), liuhosi Komandu Jerál, segunda (05/09), deside fó suspensaun preventiva ba membru na’in-ualu, hosi Komandu Munisípiu Dili, ne’ebé pikete iha  kinta (01/09), ho momentu hanesan matebian José Bernardo “Adriano”, mate ho kondisaun tali iha kakorok, iha sela detensaun Komandu PNTL Dili.

“Komandu Jerál PNTL halo ona suspensaun preventiva ba membru PNTL nain-ualu hosi Komandu PNTL Dili, liga ho kazu sidadaun José Bernardo “Adriano” mate iha sela Komandu PNTL Dili,” Portavós Komandu Jerál Polisia Nasionál Timor- Leste (PNTL), Superintendente Xefe Armado Monteiro, informa ba Jornalista sira liuhosi Konferénsia Imprensa, iha kuartél Jerál PNTL, segunda ne’e.

Notísia relevante:  Deskonfia suspeitu ida tara-aan iha sela detensaun Komandu PNTL Dili

Suspensaun preventiva ne’e ho baze ba investigasaun ne’ebé, iha loron 2 setembru 2022, Komandu Jerál PNTL halo despaisu urjénsia ho númeru 365/CG-PNTL/IX/2022, hodi kria Ekipa Konjunta kompostu hosi Ofisiál PNTL nain-haat (4), Prevedória Diretu Umanu no Justisa (PDHJ), Ministériu Públiku (MP) inklui instituisaun relevante seluk, hodi hala’o investigasaun internál liga ba kazu mate iha sela detensaun ne’e.

Portavoz PNTL, Superintendente Xefe, Armando Monteiro. Imajen Tatoli/Eugénio Pereira

“Liuhosi invetigasaun internál ne’ebé hala’o, Komandu Jerál PNTL foti medida kautelár hodi fó Suspensaun Preventiva, durante loron 60 ba membru polísia na’in-ualu hosi munsípiu Dili, kompostu hosi ofisiál nain-tolu, sarjentu ida no ajente nain-haat (4) ne’ebé mak durante  hala’o sira nia kna’ar ka pikete, maibé sidadaun ho identidade José Bernardo “Adriano” (tinan 21), mate iha sela detesaun,” katak nia.

Membru PNTL nain-ualu ne’ebé mak Komandu PNTL halo ona Suspensaun Preventiva ho naran inisál AS, MS, Aq, nu’udar ofisiál no S nu’udar Serjentu, TW, FADA, AAM no TDCP nu’udar ajente  hosi membru PNTL Komandu Munisípiu Dili.

Nia dehan, membru nain-ualu ne’e labele hala’o sira nia kna’ar no direitu hanesan polísia, maibé hanesan  sidadaun bainbain  hodi hein prosesu investigasaun. Tanba prosesu investigasaun maka sei hatene, hafoin komandu foti desizaun ikus.

“Suspensaun preventiva ne’e, atu fó oportunidade ba ita nian ekipa konjunta sira ne’ebé hala’o sira nia kna’ar investigasaun internál. Ita iha regulamentu disiplinár. Se prosesu investigasaun internál ne’e maka iha indísiu kriminál, ida-idak sei responsabiliza sira nia-aktu kriminál,” nia afirma.

Kona-ba rezultadu autópsia, Superintendente Xefe ne’e dehan rezultadu autópsia ne’e parte judisiáriu liuliu Ministériu Públiku nia kompeténsia.

PCIC halo rekonstrusaun iha lokál krime

Entretantu, Polísia Sientifika Investigasaun Kriminál (PCIC, sigla portugés), segunda ne’e, kontinua halo rekonstrusaun iha sela detensaun Komandu PNTL Munisípiu Dili hodi  rekolla evidénsia balun tan hodi hatene kauza no motivu ba José Bernardo “Adriano” ne’ebé mate ho kondisaun fiu eletrisidade iha nia-kakorok.

“PCIC rekolla ona CCTV iha Komandu PNTL Dili no hahú halo ona rekonstrusaun  iha  lokál krime atu hatene materiál sira ne’ebé maka liga ho prosesu krime hodi hatene kauza no motivu ba kazu mate iha sela detensaun ne’e,” katak nia.

PCIC halo ida ne’e tanba hola parte mós iha ekipa konjunta ba investigasaun no atu garante transparansia no akontabilidade iha prosesu investigasaun ba kazu mate iha sela detensaun ne’e.

Família haloot ona mate-isin JB

Entretantu, portavós ne’e, informa família matebian José Bernardo “Adriano” ho PNTL konkorda malu ona atu bele haloot nia mate-isin no fó fiar ba PNTL atu kontinua investiga hodi hatene motivu lolos ba mate ne’e.

Atu garante sermónia funébre mate-isin José Bernardo nian la’o ho hakmatek, Komandu Jerál PNTL delega Xefe Departamentu Polísia Komunitáriu, Superintendente Xefe António da Luz, lori Komandu nia-naran hato’o sentidu lutu no ko’alia ho familia matebian, nune’e iha ona entendimentu entre parte rua.

“PNTL ho parte família aseita malu atu haloot haloot matebian JB iha lokoraik ida, tuku iha 15:00, iha semitériu Bekusi-Dili,” nia afirma.

Tanba ne’e, nia husu ba familia matebian no sidadaun timor-oan hotu labele monu ba manobra grupu ida ne’ebé maka lansa propaganda oin oin iha média sosiál, maibé hamutuk hodi garante pás no estabilidade.

“Hamutuk, ita kria pás nafatin, unidade, amizade no promove ita nian identidade no kultra nu’udar sidadaun timoroan hodi kontribui ba estabilidade seguransa no dezenvolvimmentu nasionál,” Superientidente Xefi Armado Monteiro fó-hanoin.

Notísia relevante:   Komandu PNTL hahú forma ekipa investiga kazu tara-aan iha sela detensaun

Jornalista     : Natalino Costa

Editór             : Florencio Miranda Ximenes

iklan
iklan

Leave a Reply

iklan
error: Content is protected !!