DILI, 20 marsu 2024 (TATOLI)—Deputada membru komisaun F trata asuntu Saúde, Seguransa Sosiál no Igaulidade Jéneru iha Parlamentu Nasionál (PN), Maria Teresa Gusmão, husu Ministériu Saúde (MS) atu tau atensaun ba eletrisidade mate kleur iha munisípiu Ermera difikulta profisionál saúde fó partu ba inan isin-rua.
Notísia relevante: Eletrisidade mate kleur difikulta profesional saúde fo partu ba inan isin-rua
“Ministériu Saúde presiza fó atensaun ba ida-ne’e,” Deputada membru F ne’e hateten ba Agência Tatoli iha Parlamentu Nasionál.
Nia dehan, kestaun bee moos no eletrisidade ne’ebé antes ne’e mós komisaun halo fiskalizasaun ba fasilidade saúde balun sai mós preokupasaun boot, liuliu eletrisidade afeta ba ema nia vida, hanesan iha sala Intensive Care Unit (ICU) no sala operasaun ne’ebé mak uza liña eletrisidade bainhira ahí mate derpente, entaun uza oksijéniu bele afeta ba ema nia vida.
Nune’e, Deputada hosi bankada Partidu Demokrátiku (PD) ne’e, husu MS tau atensaun liuliu prevee orsamentu sosa jeradór rezervadu tau iha ospitál sira-ne’ebé karik laiha jeradór hodi eletrisidade mate derrepente bele uza fila-fali.
“Ha’u hanoin jeradór parese antes ne’e iha ona, maibé tanba kle’ur ona sasán ne’e to’o tempu bele avaria ka aat, tanba ne’e bele haree manutensaun ou sosa foun. Orsamentu seidauk prevee ba ida-ne’e, hanoin bele tau ona manutensaun hodi hadi´a uluk,” nia rekomenda.
Deputadu membru komisaun F, António Ferreira, mós husu ba ministériu atu tau atensaun lalais ba preokupasaun iha munisípiu Ermera eletrisidade mate kle´ur difikulta profisionál saúde fó partu ba inan isin-rua.
“Husu tau atensaun hodi bele fó atendimentu di’ak ba ita-nia pasiente sira-ne’ebé moras,” Deputadu hosi bankada KHUNTO ne’e husu.
Jornalista : Nelson de Sousa
Editór : Cancio Ximenes
