DILI, 22 marsu 2024 (TATOLI)—Reprezentante povu iha Parlamentu Nasionál (PN) liuhosi Deputadu CNRT, Mateus da Crus, husu Ministériu Transporte no Komunikasaun (MTK) liuhusi Diresaun Nasionál Transporte Terreste (DNTT) atu hadi´a semáforu ne’ebé avaria hodi evita engarafamentu iha kapitál Dili.
Notisia Relevante: DNTT sei halo manutensaun ba semáforu sira avaria iha kapitál Dili
“Situasaun engarafamentu ne’ebé agora akontese iha dadeersan, meudia, lorokraik haree fatin sira balun hanesan Elemloi no mai iha Ministériu Justisa ninian sempre mosu engarafamentu to’o oras ida no rua, tanba dalaruma semáforu la funsiona,.
Husu MTK liuhusi DNTT atu hadi´a semáforu balun ne’ebé la funsiona, hodi bele evita engarafamentu iha kapitál Dili, ” Reprezentante povu nlevanta kestaun ne’e iha uma fukun Parlamentu Nasionál.
Aleinde iha Elemloi-Comoro presiza monta semáforu iha ne’ebá, tanba agora seidauk iha, nune’e iha tempu lorokraik ne´e sempre mosu engarafamentu.
Enkuantu, antes ne’e iha reuniaun plenária Parlamentu Nasionál (PN), Deputadu sira balun mós levanta preokupasaun engarafamentu iha kapitál Dili no husu DNTT atu hadi´a semáforu sira iha kapitál Dili ne’ebé sempre avaria inklui husu atu monta semáforu iha área Elemloi-Comoro, kruzamentu Audian no fatin sira seluk ne’ebé presiza duni atu monta.
Notisia Relevante: Governu loke fali konkursu projetu instalasaun semáforu foun tolu
Jornalista : Nelson de Sousa
Editór : Cancio Ximenes
