DILI, 22 marsu 2024 (TATOLI) – Xefe Delegasaun Rejionál asuntu International Committee of the Red Cross (ICRC) ba Indonézia no Timor-Leste, Vicente Ochilet, apresia Timor-Leste nia pozisaun ba konflitu ne’ebé akontese iha Myanmar no mundu.
“Ami apresia tebes Timor-Leste nia pozisaun kona-ba asuntu hirak fereridu liuliu ba kazu sira hanesan Myanmar no Gaza, ita-boot sira mantein nafatin hodi asegura asisténsia umanitária to’o ba ema no ita-boot sira nia pozisaun hodi apoiu ba lei umanitária internasionál,” Vicente Ochilet hatete ba jornalista sira iha Palásiu Prezidensiál Dili, sesta ne’e bainhira hasoru malu ho Prezidente Repúblika José Ramos Horta.
Notísia relevante:PM Xanana husu solidariedade internasionál apoia povu Myanmar hetan liberdade
Daudaun ne’e, ICRC fó hela asisténsia umanitáriu ba populasaun afetadu sira husi konflitu iha Myanmar no Gaza-Palestina no durante ne’e akompaña hela pozisaun Timor-Leste nian hamri’ik metin hodi fó solidaridade ba vitima afetadu sira iha nasaun rua ne’ebé hasoru konflitu.
Ho nune’e, lideransa ICRC husu Xefe Estadu, Ramos Horta, atu kontinua luta ba asisténsia ba populasaun afetadu sira no atu ema bele respeita ba Lei umanitária internasionál.
ICRC hakarak servisu hamutuk ho militár no polísia Timor-Leste nian hodi asegura katak ICRC nia papél bele rekoñese no nia servisu ho organizasaun jestaun dezastre no FORENSIK sira.
Hafoin ida ne’e, lider rua ne’e koa’lia mós kona-ba konferénsia internasionál ida iha fulan-Outubru nia rohan, iha ne’ebé lideransa mundiál sira sei hamutuk ho sosiedade sivíl nasionál kada nasaun hodi diskute oinsá hasoru dezafiu ba asaun umanitária iha mundu.
Sorumutuk referidu hatudu Xefe Estadu, Ramos Horta nia kompromisu ba prinsípiu umanitária no kooperasaun multilaterál hodi rezolve krize kompleksu sira iha mundu tomak.
Notísia relevante: Ami kontinua solidáriu ho povu Myanmar- PR Horta
Jornalista: Hortencio Sanchez
Editór : Florencio Miranda Ximenes
