iklan

ERMERA, POLÍTIKA

MOP: Estrada dirasaun Gleno-Letefoho-Ermera Lama iha hela prosesu dezeñu

MOP: Estrada dirasaun Gleno-Letefoho-Ermera Lama iha hela prosesu dezeñu

Imajen Tatoli/Filomeno Martins

DILI, 21 marsu 2024 (TATOLI)—Ministru Obra Públika (MOP), Samuel Marçal, hateten estrada dirasaun Gleno ba Letefoho no Gleno ba Ermera Lama daudaun ne’e halo hela prosesu dezeñu.

Notísia Relevante: Estrada diresaun Gleno-Letefoho-Atsabe grave, autoridade lokál husu governu nia intervensaun

“Estrada Ermera ne’e halo hela dezeñu no hotu iha fulan rua mai komesa loke konkursu públiku ba konstrusaun. Faze dahuluk hosi Gleno ba Letefoho no Gleno ba Ermera Lama,” Ministru MOP, hateten ba jornalista sira iha Parlamentu Nasionál, kinta ne’e.

Governante ne’e la esplika kona-ba orsamentu hira mak prevee ba projetu ne’e, tanba iha hela prosesu dezeñu nia laran.

Antes ne’e, reprezentante povu iha Parlamentu Nasionál (PN) liuhosi Deputada bankada Partidu Demokrátiku (PD), Maria Teresa Gusmão, husu Governu liuhosi Ministériu Obras Públika atu tau atensaun ba estrada diresaun liga kapitál Gleno ho postu administrativu Letefoho no Atsabe ne’ebé iha kondisaun grave.

“Husu ba ministériu kompetente liuliu obras públika atu bele tau bele tau atensaun hodi halo intervensaun,” Deputada ne’e hateten ba Agência Tatoli iha Parlamentu Nasionál.

Nia dehan, problema estrada la’ós de’it iha munisípiu Ermera maibé kuaze iha territóriu laran afeta kona-ba kestaun estrada ne’e hosi estrada protokolu to’o ba rurál, liuliu estrada rurál oinsá mak povu atu asesu lori produtu lokál ba faan iha merkadu.

“Ida-ne’e dalaruma ita la’o fiskalizasaun ba foho, ita haree katak, estrada sira-ne’e aat entaun karreta labele tama. Ida-ne’e afeta ba povu sira atu lori sira-nia produtu la’o de’it ho distánsia dook hafoin to’o merkadu hodi faan sira-nia produtu sira,” nia dehan.

Membru hosi órgaun lejislativa ne’e husu parte ezekutivu liuhosi ministériu kompetente atu atensaun hodi hadi’a estrada sira-ne’e.

Deputada PD, Rozenha Martins, hato’o preokupasaun katak iha Gleno-Ermera iha mota Aidenu suku Talimoro, sai ameasa boot ba populasaun no estudante atu fasilita komunidade nia atividade loroloron liuliu ba estudante sira bainhira bee-mota suli makaas ne’e sira labele ba eskola.

Entretantu, nia dehan, ponte Aidenu ne’e sai ponte alternativa ba komunidade Ermera Villa, postu administrativu Hatulia B, suku Tailoro, Poetete no Ponilala.

“Ne’eduni ba Ministériu Obra Públika (MOP) atu haree ponte urjente ba fasilita lalais sira-nia atividade loroloron nian,” nia dehan.

Deputadu CNRT, Marcos Soares Martins, sekunda mós kona-ba mota Aidenu, atu Governu presiza fó atensaun.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!