iklan

DESPORTU

SLB-Assalam la konkorda FFTL realiza kopa

SLB-Assalam la konkorda FFTL realiza kopa

Jogu Primeira Divizaun Liga Futeból Timor-Leste (LFTL) AD S.L.B kontra Académica F.C, iha Estadium Munisípal Dili, tersa (14/03). Rezultadu hosi joga ne'e AD S.L.B menan Académica F.C ho golu 2-0. Imajen Tatoli/Francisco Sony

DILI, 23 marsu 2024 (TATOLI)–Klube primeira divizaun rua hosi Liga Futeból Timor-Leste (LFTL) AD SLB Laulara no Assalam FC seidauk konkorda desizaun husi Federasaun Futeból Timor-Leste (FFTL) ne’ebé atu realiza kopa FFTL iha fulan-maiu, tanba to´o agora laiha reuniaun.

“Hanesan klube primeira divizaun ami prontu atu kompete iha jogu ne’ebé mak FFTL atu realiza, maibé iha asuntu balu ne’ebé presiza deside entre ami klube 17 no FFTL atu hetan konkordansia justu nune’e ita bele hakat ba kopa ne’e,” Sekretariu Jerál SLB, Domingos Caeiro, hateten ba Agência Tatoli iha Aimutin, sábadu ne’e.

Nia dehan, la’os de’it SLB mak la konkorda maibé kuaze klube barak mak seidauk konkorda ho desizaun FFTL nian.

“La’os ami mesak mak la konkorda maibé kuaze klube barak mak la konkorda, entaun ami mesak labele atu avansa ba jogu ne’e. Ami klube 17 hosi primeira divizaun no segunda divizaun tenke aseita hotu mak jogu bele la’o,” nia dehan.

Tuir nia, antes ne’e konvite ne’ebé FFTL fó ba klube sira tau de’it iha mídia sosiál hanesan facebook, tanba ne’e SLB la konkorda no husu FFTL presiza kria enkontru ho klube sira.

“Konvite de’it sira la lori mai ami-nia sede, sira tau de’it iha facebook. Ami protesta ona sira foin lori mai fó ami. Ami husu mak ne’e FFTL tenke kria enkontru ida ho klube hotu konkorda malu ona mak ita avansa ba jogu,” nia hateten.

Klube SLB nafatin mantein nia pozisaun hodi halo preparasaun ba jogadór sira atu enfrenta jogu saida de’it ne’ebé mak sei akontese la’ós de’it kopa FFTL.

Iha fatinn seluk, Prezidente Assalam FC, Hipolito Soares, hateten FC Assalam seidauk konkorda mós desizaun FFTL nian.

“Klube hanoin tenke intende malu halo didi’ak lai, sá objetivu mak ita atu atinje iha kopa ne’e. Ami husu ba FFTL mak tenke kria lai reuniaun ida ho ami klube hotu diskute halo didi’ak, ami ba rejistu ona jogadór sira-nia naran atu bele tuir kopa ne’e,” nia dehan.

Kona-ba preparasaun ba jogadór dadaun ne’e, nia dehan, FC Assalam kontrata ona jogadór estranjeiru na’in-hitu ne’ebé seidauk bele fó sai naran.

“Semana oin ami hahú treinu ona jogadór sira. Ita kontrata ona jogadór hitu hosi estranjeiru na’in tolu agora iha Timor ona hela na’in haat mak seidauk mai. Jogadór hirak ne’e, husi Gana na’in- rua, Nigeria ida no Indonézia haat,” nia hateten.

Karketu Aseita desizaun FFTL

Aleinde ne´e, klube kampiaun LFTL tinan 2022 Karketu Dili FC konkorda ho desizaun FFTL nian ne’ebé atu realiza kopa FFTL iha fulan-maiu mai ne’e.

“Karketu sempre apoiu desizaun no hanoin hosi ne’ebé de’it, tantu hosi jerente FFTL nomós individu se de’it bainhira iha hanoin pozitivu ba dezenvolvimentu futeból iha Timor-Leste,” Sekretariu Jerál Karketu Dili FC Elizeu Isaac hateten.

Tanba ne’e, estrutura Karketu deside ona atu hala’o reuniaun hodi tau hamutuk hanoin, nune’e bele lori jogadór sira-nia naran ba rejistu iha FFTL hodi bele kompete iha kopa FFTL.

Kona-ba preokupasaun SLB no Assalam nian ne’e, Tatoli tenta konfirma ho jerente sira iha FFTL maibé okupadu ho servisu esensiál balun no seidauk bele fó resposta.

Semana kotuk, FFTL liu hosi Diretór kompetisaun no futeból Profesionál, Frederico Martins anunsiu ona ba klube 17 ne’ebé hamahan aan iha LFTL bele ba rejistu iha FFTL nune’e bele kompete iha kopa FFTL.

Rejistrasaun ba klube hahú 20 marsu to’o 05 abríl, rejistu jogadór no ofisial hahú 25 marsu to-18 abríl, depois dada rifa atu buka hatene kona-ba klube sira monu iha grupu saida hahú 27 abríl no jogu hahú 02 fulan-maiu, no jogu sei realiza iha Estádiu Munisipál Dili ho árbitru sei lidera hosi, árbitru lokál ne’ebé iha.

Klube 17 ne’e atu kompete iha kopa ne’e kompostu hosi klube primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Atletico Ultramar, Academica FC no Porto Taibessi FC.

Enkuantu, klube Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC no Zebra FC.

Iha jogu ne’e, FFTL prepara ona prémiu ba manán-na’in sira hanesan primeiru lugar sei hetan osan $15.000, segundu lugar $10.000, terseiru lugar $7,500 no kuartu lugar $5,000.

Jornalista : Hortencio Sanchez

Editór        :  Cancio Ximenes       

 

iklan
iklan

Leave a Reply

iklan
error: Content is protected !!