iklan

BOBONARO, HEADLINE, MUNISÍPIU, SEGURANSA

Aniversáriu bá da-24, PAM Bobonaro husu PNTL hakbesik ba povu

Aniversáriu bá da-24, PAM Bobonaro husu PNTL hakbesik ba povu

Prezidente Autoridade Munisipál Bobonaro, Alexandrino Pires. Imajen Tatoli/Sérgio da Cruz.

BOBONARO, 26 marsu 2024 (TATOLI) – Prezidente Autoridade Munisipál Bobonaro, Alexandrino Pires, hato’o parabéns ba Polisía Nasionál Timor-Leste (PNTL) ne’ebé aban kuarta loron 27 fulan-marsu 2024 selebra ezistensia ba da-24 nuudar instituisaun seguransa ba povu no nasaun-Timor-Leste.

Alexandre Pires, hateten durante ne’e prestasaun servisu PNTL hosi nasionál, munisípiu to’o suku seidauk masimu, tanba ne’e presiza mellora liután servisu Polisiamentu Komunitária nune’e bele envolve-an iha atividade hotu-hotu.

“Sira presiza aselera ida-ne’e, atu nune’e seguransa la’ós iha PNTL, maibé seguransa iha joven sira, bainhira sira mós envolve joven iha atividade importante hanesan desportu no atividade sosiál iha suku, bele lori sira hanoin ba joven sira, seguransa ne’e la’ós iha PNTL, maibé seguransa ne’e iha ita hotu-hotu nia responsablidade,” nia informa ba jornalista sira iha Maliana, tersa ne’e.

Nia observa durante ne’e komandu PNTL hahú mudansa no iha rejime ne’ebé di’ak, tanba halo prosesu promosaun ba ofisiál sira ho nia rekizitu tenke ema lisensiadu.

“Ida-ne’e pontu importante ida ba komandu PNTL, maske iha buat balu ne’ebé sei falla iha-ne’ebá ne’e normál, tanba instituisaun estadu ida ke boot, sempre iha falla, maibé la boot liu prestasaun ne’ebé sira ezerse ona,” nia katak.

Vise-Prezidente Konsellu Kombatente Libertasaun Nasionál Munisípiu Bobonaro, Lúcio Diniz Marques ‘Onsar’, agradese no louva tanba konsege atuasaun PNTL ba konfrontu no dezentendimentu sira-ne’ebé akontese iha territóriu laran tomak.

Tuir nia, ezisténsia PNTL ba da-24 hansan ema ida karik, idade sei joven, tanba ne’e presiza apoia no kolaborasaun mutua hosi entidade hotu-hotu liuliu joven sira, nune’e membru sira bele halo misaun no profisionál tuir lei no orden ne’ebé hatuur ona iha Timor-Leste.

“Sira mak hanesan lutu nasaun nian, atubele asegura no haree dezenvolvimentu ne’ebé la’o, ita tenke respeita sira, fó konfiansa ba sira, servisu hamutuk, karik problema ruma, pasa informasaun ba sira, atubele halo atuasaun, atu nune’e bele kria estabilidade iha ita-nia rai,” nia tenik.

Xefe suku Hosla, António Santa Cruz, husu ba Governu liuhusi Ministériu Interiór atu aumenta kapasidade rekrutamentu ba membru PNTL foun iha 2024, tanba durante tinan 20-resin ona instuisaun seguransa ne’e menur rekursu umanu.

Nia hatutan, problema ne’e inklui menus fasillidade apoia servisu, fó implikasaun ba atendimentu PNTL nia iha baze, bainhira akontese situasaun emerjénsia ruma.

“Ami husu PNTL nafatin kontrola 24 oras, signifika iha kualkér oras ne’e prezensa PNTL ne’e tenke iha fatin ne’ebé ita-nia komunidade sira presiza, tanba PNTL mai sai lutu ba komunidade iha nasaun ida-ne’e no liman kro’at ba povu iha rai ida-ne’e,” nia dehan.

Notísia relevante: Aniversáriu ba da-XXII, PR enkoraja PNTL hasa’e prezensa iha komunidade lokál

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!