DILI, 27 marsu 2022 (TATOLI)—Iha ámbitu selebrasaun aniversáriu Polísia Nasionál Timor-Leste (PNTL) ba da-XXII, Prezidente Repúblika (PR), Francisco Guterres ‘Lú Olo’, hateten, Timor-Leste nia kontestu sosiál ezije Polísia foka liu ba estratejia proativu no preventivu, duké halo abordajen reativu no represivu.
“Polísia Nasionál tenke hasa’e ninia prezensa no efikásia iha komunidade lokál nia le’et hodi halo vijilánsia no prevensaun ba krime. Atu halo nune’e, Konsellu Polisiamentu Komunitária tenke hametin asaun atu lori servisu polisiamentu besik liu komunidade no asegura seguransa komunidade ho objetivu atu haforsa sira-nia sentimentu seguransa,” PR Lú Olo hato’o mensajen ba membru Polísia sira, iha selebrasaun aniversáriu ba da-XXII, iha Sentru Formasaun Polísia Comoro, domingu ne’e.
Notísia relevante: Xefe Estadu apresia servisu PNTL asegura eleisaun prezidensiál 2022
Hosi parte seluk, PR nota katak sidadaun hanesan mós Polísia ida, tanba ne’e hodi serbí didi’ak sidadaun sira, entidade seguransa tenke haree ba konseitu sidadania, hanesan kriasaun ba Servisu Síviku Nasionál, ne’ebé bele kontribui halakon sidadaun nia individualizmu boot, falta sentimentu patriotizmu no pertense ba povu ida de’it, ne’ebé ikus mai sai hanesan kauza mahuluk ba inseguransa.
“Ida-ne’e sai dezafiu boot liu ba sosiedade atu mobiliza sidadaun sira partisipa maka’as liután iha área seguransa no fó kontribuisaun boot liután ba povu doben nia moris di’ak,” nia akresenta.
Biban ne’e, Xefe Estadu rekoñese serbisu PNTL ne’ebé susar atu garante orden no ambiente hakmatek inklui proteje ema ho sasán, ho kondisaun kria kondisaun ba seguransa, dame no estabilidade iha nasaun, maibé nafatin hatudu dedikasaun, kompeténsia no patriotizmu.
“Serbisu Polísia ho desgaste boot no risku permanente. Tanba ne’e, ho laran-ksolok tebes, ha’u fó sasin no fó hanoin hikas ba kontribuisaun loron-loron ba kauza públika, atu nune’e Timor-Leste bele sai Estadu Direitu Demokrátiku loloos,” nia tenik.
Iha sorin seluk, Xefe Estadu fó parabéns ba povu timor-oan tomak ne’ebé partisipa iha Eleisaun Prezidensiál iha loron 19 marsu ho hakmatek no tuir orden.
“Ha’u espera hahalok hanesan ne’e sei kontinua nafatin iha prosesu hametin ita-nia demokrasia. Klima seguransa ida-ne’e bele sai posível tanba knaar importante hosi PNTL no hamutuk ho FALINTIL-Forsa Defeza Timor-Leste (F-FDTL) inklui parseiru sosiál sira, hodi asegura ambiente ne’ebé nakonu ho hakmatek, independénsia no neutralidade,” Lú Olo dehan.
Tuir Xefe Estadu, direitu ba liberdade no seguransa hanesan direitu fundamentál sidadaun ne’ebé hatuur iha Konstituisaun, ne’ebé Estadu iha obrigasaun atu promove no asegura, ho kolaborasaun parte hotu.
Haburas polítika seguransa solidária
Hodi hatán ba dezafiu seguransa ohin loron, Xefe Estadu konsidera presiza haburas polítika seguransa solidária ne’ebé kahur profisionalizmu no efikásia boot hasoru kriminalidade, hamutuk ho kapasidade atu mobiliza sidadaun sira ho sira-nia asosiasaun sívika sira atu hapara no prevene krime no garante orden no hakmatek ba ema hotu.
Tanba ne’e, Konseitu Estratéjiku Defeza no Seguransa Nasionál hatudu momoos katak situasaun seguransa ohin loron lori ema hotu atu tetu hikas fali organizasaun ho knaar iha tempu globalizadu no interdependente, ne’ebé hetan mudansa lailais no beibeik, nakonu ho dezafiu, risku no ameasa oioin.
“Ho nune’e, hanesan akontese ho prosesu reforma ba defeza militár, seguransa interna presiza estuda no promove aprovasaun ba Konseitu Estratéjiku Seguransa Interna ne’ebé inovadór, hatán ba realidade foun no adekuadu ba ameasa no risku foun hirak ne’ebé mosu. Ho nune’e, ita presiza konseitu estratéjiku ida ne’ebé hamosu governasaun foun ida ba seguransa, ne’ebé envolve halo reforma ba sistema seguransa inklui ba instituisaun Polísia nian rasik,” Lú Olo hameno.
PR mós husu atu sosiedade timor-oan presiza tau-fiar metin liután ba Polísia, Ministériu Públiku no Justisa, enkuantu entidade seguransa no justisa presiza manán hikas fali povu nia fiar ba iha instituisaun atu luta hasoru krime.
Ba kestaun ne’e, ajente Polísia tenke preparadu di’ak liután hatán ba situasaun ne’ebé de’it, atu nune’e bele harii relasaun konfiansa metin ho timor-oan sira, tanba ajente autoridade no Polísia hanesan sidadaun kualifikadu ne’ebé reprezenta Estadu, ne’ebé ninia asaun sai hanesan asaun Estadu nian.
Prontu estabelese orden públika
Tuir Xefe Estadu ajente PNTL nu’udar ‘Ajente Lei’ ne’ebé tenke hetan respeitu hosi komunidade sira-ne’ebé nia serbí, iha ninia moris-fatin no iha serbisu-fatin, liuhosi hatudu onestidade, edukasaun, integridade karakter no hahalok ezemplár iha nia moris públiku no privadu.
Tanba ne’e, ajente Polísia tenke prontu estabelese hikas orden públika, bainhira de’it nesesáriu, ho maneira adekuadu no forsa natoon tuir ameasa reál ne’ebé mak atu halakon.
“Bainhira Polísia ida halo agresaun hasoru sidadaun ruma, la’ós nia mak halo agresaun, maibé Estadu. Nune’e, bainhira Polísia ruma hetan agresaun, Estadu Direitu mós hetan agresaun,” PR afirma.
PR husu mós ajente PNTL atu dixiplina, kapasitasaun, kualifikasaun no valorizasaun téknika no profisionál, hamutuk ho ninia esperiénsia operasionál no nia relasaun konfiansa ho sosiedade, tanba kestaun hirak ne’e sai hanesan elementu importante, nune’e operasaun polisiamentu sira bele hetan susesu.
“Atu Polísia sira bele hala’o knaar ho dignidade, podér polítiku tenke valoriza karreira, hodi aprova Estatutu Pesoál PNTL, inklui instituisaun nia rejime Seguransa Sosiál no Remuneratóriu, no fó kondisaun materiál, ekipamentu no infraestrutura hirak ne’ebé nesesáriu atu fasilita Forsa Seguransa sira-nia serbisu,” Lú Olo fó hanoin.
Xefe Estadu bolu atensaun atu hadi’a no hametin kooperasaun bilaterál no multilaterál ho forsa no servisu seguransa hosi nasaun seluk iha área seguransa oioin, liuliu prepara forsa sira atu hala’o misaun polisiamentu iha área fronteira, halo vijilánsia no fiskalizasaun iha tasi laran, hatán ba dezastre naturál no partisipa iha misaun pás ONU nian.
“PNTL fó prestíjiu no dignifika Repúblika Timor-Leste no sei kaer metin nafatin prinsípiu sosiedade justu, livre no seguru liután. Ha’u fiar PNTL nia domin no dedikasaun ba rai ne’e, ba povu no ba valór atu hatuur identidade, sei la mate. Tanba ne’e, ha’u hakarak fó hatene katak ami konta ho imi no ha’u fiar katak, maski situasaun hanesan ne’e, imi prontu atu hatán no hakat liu dezafiu sira aban-bainrua, tanba Timor-Leste presiza imi hotu,” PR enkoraja membru Polísia sira.
Jornalista : Hortencio Sanchez
Editora : Julia Chatarina
