Ema deskoñesidu sobu janela Eskola EBF Fatumeta hodi foti fasilidade balun
DILI, 26 marsu 2024 (TATOLI)—Ema deskoñesidu sobu janela Eskola Ensinu Báziku Filiál (EBF) Fatumeta, iha kalan, domingu (24/03), hodi foti ekran komputadór ida, sobu gaveta Koordenadór Eskola hodi foti osan $100, inklui relójiu.
“Ema ne’e mai ho ai-suak hodi selok janela. Ami-nia Guarda eskola ida de’it, loloos nia ne’e kalan hein, maibé dalaruma la toba. Horiseik ami fó hatene OPS no sira mai hasai fotografia. Ami mós fó karta ba Servisu Edukasaun munisípiu Dili hodi buka tuir,” Diretór Eskola EBF Fatumeta, Feliciano Gusmão, informa ba Agência Tatoli, iha ninia knaar fatin, Fatumeta, tersa ne’e.
Nune’e, parte eskola husu ba autoridade kompetente hodi halo investigasaun ba asuntu ne’e tanba eskola hanesan fatin apreende ba labarik ne’ebé hanesan futuru nasaun.
Notísia relevante : Diretór EBC Manleu husu Governu presiza aumenta karteira eskolár
Aleinde ne’e, eskola ne’e menus karteira eskolár, tanba ne’e jerente eskola husu ba parte kompetente atu tau atensaun ba asuntu ne’e tanba besik ona tama ezame primeiru períodu maibé karteira eskolár barak mak ho kondisaun a’at.
“Ami halo ona proposta ba edukasaun munisípiu Dili maibé seidauk iha resposta, ne’ebé ami hein bainhira mak ami bele iha fasilidade ne’e,” nia akresenta.
Eskola EBF Fatumeta daudaun ne’e akumula estudante 934, profesór 18, saladeaula 10 ne’ebé fahe ba turnu rua, dadaeer no lorokraik.
Iha fatin hanesan, Guarda Eskola EBF Fatumeta, José da Cruz, husu atu atu parte eskola bele prepara fatin seguru ba guarda eskola, nune’e kalan bele mai toba iha eskola.
“Maibé karik laiha fatin ne’e oinsá mak Guarda eskola kalan atu mai toba iha eskola, tanba dalaruma susuk tata ita la toba,” nia tenik.
Jornalista : Osória Marques
Editora : Julia Chatarina
