MAPPF distribui tratór ba munisípiu ne’ebé poténsia ba produsaun hare

DILI, 26 Marsu 2024 (TATOLI) – Munisípiu hitu ne’ebé iha natar potensiál sai prioridade ba Ministériu Agrikultura, Pekuária, Peska no Floresta (MAPPF) hodi apoia ekipamentu pezadu hanesan tratór ho kuantidade barak hodi hasa’e produsaun hare.

Diretór Nasionál Ortikultura, Lúcio Ribeiro, informa katak ministériu daudaun ne’e disponibiliza ona tratór ba munisípiu sira, esetu Dili, Aileu, Lautém no RAEOA mak tinan ne’e la hetan tulun, tanba la tama iha planu ministériu nian.

Diretór ne’e haktuir katak husi munisípiu hitu ne’ebé poténsia ba produsaun haree ne’e Viqueque hetan tratór haat, Baucau tolu, Manufahi lima, Covalima haat, Ainaro tolu, Manatutu tolu no Bobonaru tolu.

Lúcio Ribeiro salienta katak ba munisípiu rua seluk mak Ermera no Liquiçá hetan de’it tratór ida tanba sira-nia produsaun hare la barak.

“Aileu no Lautém sira mós iha natar, maibé la barak. Aileu iha de’it natar kuaze ektare 300, depois Lautém iha ektare purvolta 500. Tanba ne’e, ita planeia ona ba tinan oin atu hasa’e mós produtividade haree iha munisípiu rua ne’e atu bele fó mós kontribuisaun ba hasa’e kuantidade hare no foos iha rai-laran”, Lúcio Ribeiro hatete ba Tatoli, iha Comoro, ohin.

Diretór-Jerál Kafé no Planta Industriál, Martinho Soares, reforsa katak ba Aileu no Lautém sira sei tau prioridade ba faze daruak tanba planu ministeriu nian sei sosa tan tratór hodi distribui ba munisípiu sira ne’ebé seidauk hetan.

“Ita tau ona iha planu atu sosa tan tratór iha faze daruak hodi kontinua distribui ba grupu agrikultór sira. Ita sei apoiu mós trator ida ba Aileu no ida ba Lautém, nune’e sira mós bele halo preparasaun hodi hasa’e sira-nia produtividade”, nia realsa.

Rekorde katak MAPPF sosa ona tratór foun hamutuk unidade 25 husi Orsamentu Jerál Estadu 2023 hamutuk rihun $848. Ekipamentu sira ne’e atu ajuda agrikultór sira hodi hasa’e produsaun agríkola, liuliu haree.

Tuir planu, iha 2024 ne’e, MAPPF sei sosa tan tratór unidade 25 ho modelu hanesan no hand tractor 200 no mini tiller 50.

Antes ne’e, MAPPF iha ona tratór hamutuk unidade 300 maka durante ne’e apoia ona agrikultór sira hodi halai natar, maibé tratór sira ne’e kuaze tinan naruk ona no barak maka nia kondisaun ladi’ak.

Notísia relevante: Tratór foun unidade 25 sei tulun agrikultór sira hasa’e produsaun agríkola

Jornalista: Tomé Amado

Editora: Maria Auxiliadora