iklan

POLÍTIKA

Meza PN baixa projetu-lei Protokolu Estadu ba komisaun B

Meza PN baixa projetu-lei Protokolu Estadu ba komisaun B

Deputada, Maria Teresinha Viegas.

DILI, 26 marsu 2024 (TATOLI)—Meza Parlamentu Nasionál (PN), tersa ne’e, liuhosi reuniaun plenária anúnsiu no baixa projetu-lei númeru 7/VI (1a)- Prosedénsia no Protokolu Estadu ba komisaun B trata asuntu Negósiu Estranjeiru, Defeza no Seguransa hodi fó apresiasaun inisiál.

Notísia Relevante: Governu-PN presiza kria Lei Protokolu Estadu

“Nune’e konvida Prezidente komisaun B hodi simu projetu-lei,” Prezidente Interina no atuál Primeira Vise Prezidente PN, Maria Teresinha Viegas, fó sai iha sala plenária PN.

Primeira Vise Prezidente ne’e seidauk esplika detallu konteúdu projetu-lei ne’e tanba komisaun sei fó uluk apresiasaun inisiál.

Antes ne’e, liuhusi reuniaun plenária, Deputada CNRT, Maria Gorumali Barreto, husu Governu atu koordena ho órgaun lejislativu hodi bele kria Lei Protokulu Estadu, tanba Timor-Leste restaura ona nia indepedénsia tinan 20-resin laiha lei Protokolu Estadu, nune’e ita falla iha protokolu Estadu bainhira realiza eventu importante sira husi instituisaun Estadu.

Tanba ne´e, nia dehan, presiza halo kapasitasaun ba protokulu iha ministériu sira hotu no kria Lei Protokolu Estadu.

Deputada CNRT, Angela Maria Corvelo de Andrade Sarmento, hateten protokulu Estadu ne’e preokupasaun ita tenke iha duni lei protokolu Estadu, tanba ita haree dalabarak ita-nia entidade boot sira ladún tuir regra protokolu.

“Protokolu ne’e regra ida. Ita bele dehan, ne’e mai husi ita-nia beiala sira no iha uma lulik sira mós iha protokolu. Tanba ne’e mak Estadu presiza iha duni lei ida protokolu Estadu hodi regula ema hotu tuir,” nia dehan.

Prosesu halo lejislativu komun  

Tuir Konstituisaun Repúblika Demokrátika Timor-Leste (KRDTL) iha artigu 92 (Definisaun) Parlamentu Nasionál mak órgaun soberania Repúblika Timor-Leste nian ne’ebé reprezenta ema timoroan tomak, iha kbiit atu halo lei, atu fiskaliza no atu halo desizaun polítika.

Iha konstituisaun RDTL artigu 95 (Kompeténsia Parlamentu Nasionál nian), iha alinea 2 hateten Parlamentu Nasionál de’it mak halo lejizlasaun kona-ba:

a.) Rai-ketan RDTL nian, tuir artigu númeru 4;

b.) Limite bee tasi laran Timór nian no mós zona ekonómiku eskluziva ho tan direitu Timór-Leste nian ba zona tatutan no plataforma kontinentál;

c.) Símbolu nasionál sira, tuir no.2 artigu 14;

d.) Sidadaun;

e.) Direitu, liberdade no garantia sira;

f.) Estadu no kapasidade ema nian, direitu família nian no mós jerasaun ne’ebé sei mai;

g.) Fafahek territoriál;

h.) Lei eleisaun nian no mós rejime referendu nian;

i.) Partidu no mós asosiasaun polítika sira.

j.) Deputadu sira nia Estatutu;

k.) Titulár sira-nia estatutu iha Estadu nia organizasaun;

l.) Baze sistema hanorin nian;

m.) Baze sistema seguransa sosiál no mós saúde nian;

n.) Suspensaun garantia konstitusionál nian no mós deklarasaun Estadu serku ho tan estadu emerjénsia nian;

o.) Defeza no seguransa nia regra;

p.) Regra fiskál;

q.) Rejime orsamentu nian.

Entertantu, Agência Tatoli sita Rejimentu Parlamentu Nasionál (RPN) hosi artigu 91 to’o 111 kona-ba prosesu lejislativa komun ka bolu oinsá prosesu atu prodús lei ida iha órgaun lejislativu ne’e.

Hanesan iha Rejimentu Parlamentu Nasionál (RPN) ba prosesu lejislativa komun, iha artigu   91.º (Inisiativa nia forma), iha alinea 1 hateten inisiativa orijinária ba lei hanaran projetu-lei bainhira Deputadu no bankada Parlamentár sira mak ezerse inisiativa ne’e no hanaran proposta-lei bainhira Governu mak ezerse.

Admisaun no kanselamentu ba inisiativa tuir artigu 95.º iha alinea 1 katak aprezenta tiha inisiativa lejislativa ruma, inisiativa ne’e tenke numerada no depois verifika tiha rekezitu sira-ne’ebé iha tuir lei, Prezidente halo despaixu admisaun no hatún ba komisaun  kompetente, karik tenke no fó hatene iha plenáriu.

Ezerse inisiativa lejislativa tuir artigu 96.º, iha alinea 1 hateten laiha projetu-lei ida mak bele subskritu husi Deputadu liu na’in-10 no alínea 2 katak proposta-lei subskritu husi Primeiru Ministru no ministru kompetente kona-ba matéria no tenke hetan aprovasaun husi Konsellu Ministru.

Ba apresiasaun dahuluk iha komisaun tuir artigu 101.º haruka projetu no proposta-lei iha alinea 1 katak, simu tiha kualkér projetu ka proposta-lei no fahe tiha kópia ba bankada parlamentár sira, Prezidente liuhosi despaixu haruka testu ba komisaun kompetente kona-ba matéria hodi halo apresiasaun no elabora relatóriu no paresér.

Tuir mós rejimentu PN artigu 102.º lejislasaun kona-ba servisu, hateten bainhira simu lejislasaun kona-ba servisu, komisaun tenke fó oportunidade ba organizasaun sindikal ka patronál, no mós Governu atu hato’o sira-nia apresiasaun ba projetu ka proposta-lei, iha prazu ne’ebé komisaun fixa tuir finalidade.

Artigu 103.º prazu ba apresiasaun dahuluk ba inisiativa iha komisaun, iha alinea 1, komisaun hato’o ninia apresiasaun liuhosi relatóriu ida hodi fundamenta ninia paresér, iha prazu ne’ebé Prezidente PN marka.

Tuir mai iha diskusaun no votasaun iha jeneralidade iha plenáriu artigu 105.º inísiu diskusaun, iha alínea 1 haktuir diskusaun iha jeneralidade foka ba prinsípiu no sistema projetu ka proposta-lei ida-idak nian.

Artigu 106.º prazu mínimu molok debate iha jeneralidade, ba projetu ka proposta-lei labele debate iha jeneralidade molok liu prazu loron hitu, sura hahú husi data admisaun, la taka dalan ba buat ne’ebé hakerek iha artigu 97.º.

Tuir mai iha artigu 107.º votasaun, iha alinea 1 katak votasaun iha jeneralidade foka ba projetu ka proposta-lei ida-idak. Iha alinea 2 hateten depois aprova iha jeneralidade, projetu ka proposta-lei bele baixa ba komisaun kompetente kona-ba matéria ne’e hodi halo apresiasaun no votasaun iha espesialidade.

Artigu 109.º diskusaun iha espesialidade foka ba artigu ida-idak, no artigu 110.º votasaun iha espesialidade bele foka ba artigu, númeru ka alínea ida-idak.

Tuir mai votasaun finál globál no redasaun finál iha artigu 111.º, katak ramata tiha votasaun iha espesialidade iha plenáriu, halo kedas votasaun finál globál.

Bainhira aprova ona iha espesialidade iha komisaun, haruka testu ba plenáriu hodi halo votasaun finál globál.

Hafoin ne’e komisaun kompetente halo redasaun finál hodi haruka ba meza Prezidente PN hafoin envia ba Prezidente Repúblika mak iha kompeténsia eskluziva atu promulga ka veta.

Notísia Relevante: PN aprova proposta-lei Prezidénsia-Protókolu Estadu iha faze jeneralidade

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!