iklan

NASIONÁL, EKONOMIA, DILI, HEADLINE, LIQUIÇÁ, MUNISÍPIU

PAM Liquiça prioriza programa hamutuk 13 durante mandatu

PAM Liquiça prioriza programa hamutuk 13 durante mandatu

Prezidente Autoridade Munisípiu Liquiçá, Paulino Ribeiro. Imajen/FB

DILI, 26 marsu 2024 (TATOLI) – Prezidente Autoridade Munisípiu (PAM) Liquiça, Paulino Ribeiro, informa, durante mandatu prioriza programa hamutuk 13 no sub-programa hamutuk 30 no atividade 77 hodi dezenvolve Liquiça.

“Iha ha’u nia mandatu tau programa prioridade hamutuk 13 ne’ebé ita sei dezenvolve, programa prioridade ida mak estrada iha Suku no aldeia sira ita tenke hadia, bee-moos, eletrisidade, dezenvolve setór Saúde hamutuk ho Governu sentrál, edukasaun liuliu haree ba infrastrutura báziku sira, agrikultura, turizmu, jestaun merkadu no seluk tan ne’ebé ita tau prioridade,” PAM Liquiça katak ba Agência TATOLI iha Faról Dili, tersa ne’e.

Imajen/TATOLI,I.P

Nia dehan, objetivu hosi prioriza programa hirak ne’e tanba tarjetu Governu sentrál nian 2028 katak infrastrutura báziku sira tenke dezenvolve hotu, liuliu estrada ligasaun Suku ba Aldeia bele di’ak no infrastrutura báziku ba Saúde no edukasaun labele sai bebeik problema iha sosiedade inklui bee-moos no eletrisidade.

“Liquiça nia estatutu foin mak muda ba Prezidente Autoridade tanba antes ne’e nia estatutu hanesan Adiminitradór, ida ne’e signifika poder hosi Governu sentrál 50% fó ona ba Munisípiu, klaru buat ne’ebé boot ami sei koopera ho Governu sentál hanesan, saúde, edukasaun, turizmu depende ba alokasaun poder hosi Governu sentrál, maibé ami sei koopera ho sira atu aselera ita nia dezenvolvimentu liuliu Liquiça,” nia katak.

Tuir nia, poder ne’ebé Governu sentrál haraik ona ba PAM Liquiça mak, merenda eskolar ba pre-eskolar no ensinu báziku, iha área terras propriedade konsege fó ona poder tolu hanesan, identifika, notifika, atualizasaun dadus, programa Planu Dezenvolvimentu Suku (PNDS) no seluk tan.

“Ita agora iha mós diresaun dezenvolvimentu Munisipál integradu, diresaun ida ne’e sei servisu hamutuk ho diresaun infrastrutura atu identifika problema infrastrutura báziku sira ne’ebé ita presiza tau atensaun, ne’ebé agora ami sei rekolla dadus, ezemplu hanesan edukasaun karik iha Suku no Aldeia sira presiza tan sala-aula hira, saúde presiza tan postu saúde hira, estrada sira ita presiza hadia ne’ebé-ne’ebé, ita foti hotu ona dadus sira ne’ebé apoiu másimu hosi estatistika Munisipál atu nune’e ba oin ita bele halo servisu,” nia relata.

Tuir dadus ne’ebé iha, estrada iha Suku sira ne’ebé kondisaun sei grave mak hanesan, Loes ligasaun Faulara, Dair ligasaun Kaikasa, Maubara Vila liga Vatubou, Liquiça-Vila liga Suku Asumanu no seluk tan.

“Dalan barak mak ita seidauk rezolve, ita foin mak rezolve dalan ida hosi Aipelu liga ba Bazartete, entaun sira seluk seidauk ne’e tinan ne’e ita komesa book ona servisu hamutuk ho PNDS no Governu sentrál, PNDS Governu entrega ona mai ita entaun ita servisu hamutuk ho sira sei di’ak liu tanba orsamentu PNDS nian ba tinan ne’e iha kapitál dezenvolvimentu nian hamutuk millaun $1.4 ne’ebé atu koloka ba Suku sira iha Liquiça,” afirma.

Entretantu, orsamentu ba Liquiça ne’ebé atribui hosi Governu sentrál tinan 2024 hamutuk millaun $12 n’ebé fahe ba kategoria haat hanesan, salariu bensimentu, kapitál menor, kapitál dezenvolvimentu no transferensia públika.

Liquiça preparadu implementa desentralizasaun

“Ita nia preparasaun ba desentralizasaun mak book dadaun iha infrastrutura báziku ba setór hotu ne’ebé mak Liquiça iha, ne’ebé ita agora ne’e hahú prepara ona,” nia dehan.

Durante ne’e Liquiça iha diresaun jerál hamutuk 19 balu iha ona edifisiu no balu to’o agora seidauk iha edifisiu propriu no Autoridade Munisipál komesa servisu makas atu harii edifisiu ba diresaun sira ne’ebé seidauk iha fatin propriu ba hala’o servisu.

“Diresaun barak mak seidauk iha edifisiu ezemplu hanesan PNDS, agrikultura, jestaun merkadu no turizmu, alimentasaun seguransa, sira ne’e durante servisu utiliza de’it sala balu Munisípiu nian, buat sira ne’e mós tama kriteria ba desentralizasaun entaun ba oin ita sei haree tau atensaun no seluk tan ita realiza tia nasionál ba halo avaliasaun kona-ba pontu importante hamutuk 450 iha Munisípiu prinese ona 50% foin  avansa ba desentralizasaun realiza eleisaun poder lokál,” nia haktuir.

Tanba ne’e, PAM orienta funsionariu hotu iha Liquiça atu halo servisu ne’ebé másimu nune’e bele priense kriteria hamutuk 450 ne’ebé fó sai hosi Governu sentrál ba desentralizasaun.

Problema agrikultura iha Liquiça

Ema númeru ida iha Liquiça ne’e hatutan, problema ne’ebé komplikadu iha Liquiça mak agrikultura liuliu iha pekuariu.

“Agrikultura iha Liquiça problema uitoan, dadus laiha liu kona-ba animál nian, ita la hatene iha Liquiça karau komunidade sira nian to’o agora hamutuk hira, manu hira, fahi hira, bibi hira, entaun bainhira ha’u ba asume kargu Prezidente Autoridade orienta kedan extensionista sira atu tun ba iha Suku sira hamutuk ho Xefe Suku no Xefe Aldeia sira atu identifika foti dadus atu nune’e bele rezista, ida ne’e meiu ida oinsa Governu bele fasil tau atensaun hodi hase’e produsaun ekonomia liuliu kona-ba naan nian”.

“Agora ita la hatene totál animál oinsa ita atu halo vasinasaun ba animál sira, aat liutan mak animál sira husik livre hela. Ida ne’e problema ba ita atu dezenvolve hasa’e produsaun animál,” katak.

Enkuantu kona-ba produtu lokál sira hanesan kafé, batar, ai-farina no aifuan seluk PAM Liquiça mós sei tau atensaun hodi dezenvolve liuliu Suku sira iha parte foho noan hanesan, Leorema, Asumanu, Metagou, Fahilebu, Fatumasi no seluk tan.

Identifika harii fatin turizmu

Dadaun ne’e PAM Liquiça mós planu ona oinsa atu identifika tasi-ibun ne’ebé potensia ba turizmu nune’e bele dezenvolve.

“Fatin turizmu nian mak ita konsege identifika ona tasi-ibun balu iha Kaitehu, tasi-ibun Koni nian no tasi ibun seluk tan ne’ebé ita haree merese atu sai fatin turizmu hodi atrai vizitante sira, tinan ne’e ita tau osan hamutuk rihun $200 atu dezenvolve fatin sira ne’e, agora iha hela prosesu tenderizasaun,” nia katak.

Nune’e nia husu ba komunidade sira ne’ebé hela iha tasi ibun hahú Tibar to’o Loes labele fan rai hirak ne’e tanba tuir lei husi tasi-ibun mai rai maran metru 50 Estadu nian atu dezenvolve.

“Ne’ebé komunidade sira hela iha tasi-ibun atensaun, rai ne’ebé iha tasi ibun labele fan, hosi tasi ibun mai rai-maran metru 50 ne’e Estadu nian, bainhira komunidade sira hela liu ona, karik Estadu presiza sira tenke halo mamuk no Estadu sei fó indimunizasaun,” nia salienta.

Liquiça kompostu hosi Postu Administrativu haat, hanesan Bazartete, Liquiça-Vila, Maubara no Loes ho nia Suku hamutuk 23 no Aldeia hamutuk 134.

Notísia relevante:Autoridade munisípiu Liquiçá foun hakarak lori governasaun hakbesik ba povu

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!