iklan

NASIONÁL, JUSTISA, HEADLINE

Alterasaun lei CAC, elimina rekezitu Deputadu ¾ marka prezensa iha eleisaun

Alterasaun lei CAC, elimina rekezitu Deputadu ¾ marka prezensa iha eleisaun

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (27/03/2024). Imajen Tatoli/Francisco Sony

DILI, 27 marsu 2024 (TATOLI)Governu liuhosi reuniaun ordinária Konsellu Ministru (KM), kuarta ne’e, aprova projetu proposta-lei, ne’ebé aprezenta husi Prezidénsia Konsellu Ministru, kona-ba alterasaun daruak hosi lei númeru 8/2009, loron 15 Jullu, Komisaun Antí-Korrupsaun (CAC, sigla portugés).

“Ho diploma ida-ne’e, Komisáriu sei bele eleitu ka ezoneradu ho maioria absoluta husi Deputadu sira iha Parlamentu Nasionál, no sei elimina rekezitu katak tenke pelumenus datoluk haat ka ¾ husi Deputadu sira marka prezensa ne’ebé hala’o hela funsaun,” Vise-Ministru Asuntu Parlamentár, Adérito Hugo da Costa, ralata hafoin reuniaun ezekutivu, iha Palásiu Governu.

Notísia relevante : FRETILIN-CNRT iha ona konkordánsia ba eleisaun komisáriu CAC

Governu halo alterasaun ba lejizlasaun ne’e tanba husik kedas CAC harii, ezijénsia husi kórum deliberativu reforsadu atu hala’o eleisaun ba Komisáriu difikulta ona prosesu eleitorál ne’ebé normál no regulár, nune’e afeta funsionamentu órgaun polísia kriminál espesializadu iha kombate ba korrupsaun.

Proposta lei ne’e determina mós katak Komisáriu ne’ebé mandatu ramata ona bele kontinua hala’o ninia knaar to’o titulár foun simu pose, nune’e bele garante kontinusaun servisu públiku no atinje misaun ne’ebé sai hanesan objetivu hodi kria CAC.

Komisáriu CAC, Sérgio Hornai da Costa, ninia mandatu ramata iha loron 21 janeiru 2023, ne’ebé to’o agora seidauk iha naran foun okupa kargu ne’e tanba laiha konsensu entre Deputadu Bankada Governu no Opozisaun.

Tuir lejizlasaun ne’ebé vigora, naran Komisáriu sira-ne’ebé propoin husi Governu sei analiza no vota husi Deputadu sira no ninia designasaun presiza maioria absoluta husi Deputadu ne’ebé marka prezensa, pelumenus ¾ husi Deputadu ho funsaun efetiva ka Deputadu 48.

Iha sorin seluk, Deputadu Bankada Governu hamutuk 37 (CNRT no PD), hosi totál Deputadu 65 ho funsaun efetiva.

Liuhosi reuniaun líder bankada Parlamentu Nasionál, konsege halo ona ajenda dala-neen hodi diskute kona-ba naran Komisáriu ne’ebé Governu propoin ona, maibé tanba razaun téknika ka kórum la to’o maka la konsege realiza to’o agora.

Iha loron 19 fevereiru, Governu  haruka ona naran Rui Pereira dos Santos, nu’udar kandidatu úniku ba Komisáriu CAC.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!