iklan

NASIONÁL, JUSTISA, HEADLINE

Governu kria rejime espesiál bolsa estudu ba setór justisa

Governu kria rejime espesiál bolsa estudu ba setór justisa

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (27/03/2024). Imajen Tatoli/Francisco Sony

DILI, 27 marsu 2024 (TATOLI)Primeiru-Ministru, Kay Rala Xanana Gusmão, aprezenta projetu dekretu-lei kona-ba kriasaun rejime espesiál bolsa estudu ba setór justisa, ne’ebé hetan ona aprovasaun iha ámbitu reuniaun ordinária Konsellu Ministru (KM).

“Ita iha rejime ida rejista kona-ba Fundu Dezenvolvimentu Kapitál Umanu (FDCH, sigla portugés), maibé Governu haree katak setór justisa nu’udar setór importante tebes no hahú hosi kompromisu ida-ne’e mak reforma ba setór justisa, nune’e ba aspetu rekursu umanu iha setór justisa nian, Governu haree katak presiza iha rejime espesiál ne’ebé mak rejime bolsa estudu ba setór justisa,” Vise-Ministru Asuntu Parlamentár, Adérito Hugo da Costa, ralata hafoin reuniaun ezekutivu, iha Palásiu Governu.

Notísia relevante : FDCH foku ba implementasaun programa prioridade haat

Bolsa ne’e ho objetivu atu finansia kursu ensinu superiór hodi hetan grau lisensiatura, mestradu no doutoramentu iha siénsia jurídika husi sistema sivilista, formasaun iha medisina legál, asaun formasaun profisionál,  formasaun espesializada ba formadu sira Sentru Formasaun Jurídika no Judisiária, no estájiu profisionál hodi hala’o profisaun ida.

Programa ne’e sei finansia husi FDCH no jere husi Grupu Traballu ba Reforma Setór Justisa, liuhusi orientasaun Primeiru-Ministru nian.

Governu sei halo preparativu hotu hodi haruka bá Prezidente Repúblika hodi promulga.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!