DILI, 06 marsu 2024 (TATOLI) – Diretór Ezekutivu Fundu Dezenvolvimentu Kapitál Umanu (FDCH, sigla portugés) Julio Aparicio, hateten FDCH iha tinan-ne’e sei foku ba programa prioridade haat.
“Tinan ne’e FDCH iha programa programa prioridade haat mak hanesan jenériku, formasaun tékniku estatéjiku, bolsu estudu, bolsu no iha dezenvovmentu institusionál”, hateten Julio Aparicio ba jornalista sira hafoin selebrasaun akordu kooperasaun servisu ho Centro Nacional Chega (CNC) ne’ebé halo iha Balide, kuarta ne’e.
Nia dehan, ba bolsu estudu nian, tuir polítika IX Governu Konstituisionál kada tinan tenke loke vaga ba bolsu estudu ba timoroan 1.129, tanba ne’e hosi parte FDCH sei foku hodi loke vaga ba bolsu estudu ba iha área médiku nian ho mínimu ema nain-20 no másimu ema 25 kada tinan iha área espasilidade sira seluk.
Nia dehan, hosi orsamentu um pontu seis milhões ne’e FDCH prevé balun ba Ospitál Nasíonál Guidu Valadares no Ministériu Saude, ministériu sira seluk inklui institusaun sira seluk atu hodi jere hodi fó bolsu estudu médiku sira atu sira kontinua eskola iha Fiji no Kuba hodi aumenta nia koñesimentu hodi mellora servisu saúde ba povu.
Iha parte tékniku nian, FDCH mós halo ona kontatu ho universidade Petromas iha Malázia no Univeridade iha Thalándia hodi haruka ba eskola iha ne’ebá atu bele ba futuru dezenvolve Timor-Leste sai di’ak liután.
Julio Aparicio mós hateten, iha nia mandatu sei la taka dalan ba timoroan maibé hakarak konkore vaga bolsu estudu mak FDCH sei fasilita, maibé timoroan tenke iha prestasaun ne’ebé di’ak duni.
Tanba tuir polítika IX Governu konstitusionál FDCH tenke loke vaga bolsa estudu ba ema nain -1.129, hosi númeru ne’e iha suku ida tenke reprezenta ema nain ida.
“FDCH prontu atu ajuda joven sira maibé kritériu mak tenke ema ne’ebé mak matenek duni, badinas luta hodi sai susesu. Kuandu estudante inkomprimentu mak sira iha obrigasaun tomak atu devolve fali osan ne’ebé sira simu tiha ona, ida-ne’e mak kritériu”, nia subliña.
Nia dehan, estudante ne’ebé hetan bolsu hosi FDCH hodi halo estudu iha ensinu superiór iha rai laran kada fulan hetan osan $150.
“Maibé kuandu nia uza fali osan ne’e ba nia privadu no la halo estudu tuir kontratu ne’ebé iha mak iha ha’u nia tempu sé nia hetan bolsu estudu hosi FDCH mak la akaba nia estudu tenke devolve osan ne’e”, nia iforma.
Enkuntu, programa FDCH nian ba fortalesimentu institusionál, Julio hateten, tinan ne’e, FDCH sei foku ba infraestutura liuliu atu harii edifísiu própriu ba FDCH iha tinan ne’e.
Jornalista: Natalino Costa
Editór : Zezito Silva
