iklan

EDUKASAUN, BOBONARO, POLÍTIKA

Governu presiza kria kondisaun ba eskola TEKVOK Atabae

Governu presiza kria kondisaun ba eskola TEKVOK Atabae

Estudante Eskola Ensinu Sekundáriu Tékniku Vokasionál Becora hahú prátika reparasaun kadeira, iha resintu eskola, sesta (08/04). Imajen TATOLI/Tomé Amado

DILI, 27 marsu 2024 (TATOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN) husu Governu liuhusi Sekretária Estadu Ensinu Sekundáriu Jerál no Tékniku Vokasionál presiza kria kondisaun ba eskola Ensinu Sekundáriu Tékniku Vokasionál (TEKVOK) iha postu Atabae, munisípiu Bobonaro.

Notísia Relevante: Komisaun G iha PN husu hadi´a implementasaun merenda eskolár

Prezidente Komisaun G lideradu husi Armando Lopes, akompaña Deputadu membru komisaun, foin lalais, hala’o fiskalizadaun ba iha Ensinu Sekundáriu Tékniku Vokasionál (TEKVOK) Atabae hodi rona direta difikuldade sira-ne’ebé mak iha presiza duni fó atensaun.

“Difikuldade sira-ne’ebé eskola hasoru, durante ensinu aprendizajem mak hanesan sei menus matéria dalen portugués ho inglés, menus manorin iha área informátika no livru atu hanorin iha área ne’e laiha,” hanesan haktuir iha relatóriu fiskalizasaun komisaun G ne’ebé Agência Tatoli asesu, kuarta ne’e.

Problema falta livru dalen portugués no laiha manorin iha área dalen portugés ba klase 12°, falta livru ba departamentu peska husi klase 10° to’o 12° ano.

Nune´e mós, laiha fasilidade ekipamentu prátika hanesan mákina no mós mákina ró ba departamentu peska, falta karteira eskolár (meza ho kadeira) ba manorin sira, eskola laiha moru protesaun no laiha biblioteka.

Aleinde eskola ne’e husu atu apoiu ekipamentu komputadór ba área informátika hodi halo prátika, tanba durante ne’e alunu sira labele hala’o prátika ho di’ak no daudaun iha de’it komputadór lima.

Ho difikuldade sira-ne’e, Komisaun G iha Parlamentu Nasionál (PN) husu ezekutivu liuliu ministériu relevante atu tau atensaun hodi tau iha konsiderasaun.

Enkuantu, relatóriu fiskalizasaun ne’e diskute iha reuniaun komisaun iha loron 18 fulanmarsu 2024 no hetan aprovasaun ho votu a-favór neen, kontra no abstensaun zero no meza PN iha reuniaun plenária loron 25 fulan-Marsu liu-ba halo ona distribuisaun no haruka mós kópia ba ezekutivu liuhusi entidade relevante hodi bele tau atensaun.

Iha eskola Ensinu Sekundáriu Tékniku Vokasionál (TEKVOK) Atabae ne’e, iha departamentu hamutuk tolu (3) mak hanesan Sekretariadu, Komérsiu no Peska, ho totál estudante hamutuk 400 no iha manorin permanente hamutuk na´in-26.

Eskola Ensinu Sekundáriu Tékniku Vokasionál (TEKVOK) Atabae ne´e, hahú iha tinan 2017 hodi loke departamentu rua (2) mak hanesan Sekretariadu ho Komérsiu, no iha tinan 2018ne´e loke tan departamentu peska.

Hosi 2017 to’ o 2024 ne´e, eskola Ensinu Sekundáriu Tékniku Vokasionál (TEKVOK) Atabae ne’e prodús ona estudante 652 ne’ebé akaba ona sira-nia estudu.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!