DILI, 27 marsu 2024 (TATOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), husu ezekutivu liuhusi entidade relevante atu hadi´a implementasaun merenda eskolár.
Notísia Relevante: ME prevee rihun $35 atu superviziona programa merenda eskolár
Prezidente komisaun G, lideradu husi Armando dos Santos Lopes, akompaña Deputadu membru komisaun, foin lalais hala’o fiskalizasaun ba Ensinu Pre-Eskolár Lequitura no Ensinu Báziku Sentrál (EBS) terseiru síklu Daisoli iha Aileu, Ensinu Báziku Sentrál (EBS) Diligência iha Manufahi, identifika implementasaun merenda eskolár durante ne’e iha eskola sira-ne’e presiza hadi´a.
“Atividade fiskalizasaun ba iha Ensinu Pre-Eskolár Lequitura, identifika hasoru difikuldade mak merenda eskolár seidauk implementa mezmu aula hahú ona, laiha armajen atu tau sasán merenda eskolár hanesan foos, mina, masin no utensíliu dapur nian, iha eskola laiha refetória atu alunu sira han merenda eskolár,” refere relatóriu fiskalizasaun komisaun G ne’ebé Agência Tatoli, asesu, kuarta ne´e.
Iha Ensinu Báziku Sentrál (EBS) terseiru síklu Daisoli, identifika laiha dapur hodi prepara merenda eskolár, laiha armajen tau alimentu merenda eskolár no merenda eskolár seidauk implementa maibé aula hahú ona.
Komisaun G halo mós hala´o sorumutu ho Diretora Edukasaun munisipál Aileu, ne’ebé aprezenta difikuldade no dezáfiu ne’ebé mak eskola sira iha munisípiu ne’e kontinua hasoru ba Deputadu sira, espesífikamente ba merenda eskolár, problema ne’ebé hasoru mak menu presiza hadi´a.
Osan merenda eskolár presiza liuhusi lejislasaun ruma hodi define kompeténsia diretiva eskola sira bele halo kontrolu ba iha grupu EGP sira.
“Se lae grupu EGP sira-ne’e hanesan fali independente no diretór eskola sira asina de’it relatóriu no eskola halo kontratu ho grupu EGP ne’ebé mak fornese ai-han ba estudante sira. Distribuisaun osan ba merenda eskolár depende ba númeru estudante sira, tuir matadalan osan 75% sosa produtu lokál no realidade produtu balun presiza ba sosa fali iha munisípiu seluk. Ezemplu, mak manu tolun ba sosa iha Railaco-Ermera, manu lokál nia folin karun,” relatóriu komisaun G ne´e haktuir.
Atividade fiskalizasaun iha munisípiu Manufahi ba Ensinu Báziku Sentrál (EBS) Diligência, identifika problema hanesan mak kalendáriu eskolár hahú ona maibé to’o agora merenda eskolár seidauk implementa.
Problema seluk mak falta bee moos, falta refetóriu no armajen atu tau ai-han no utensiliu merenda eskolár nian.
Ho difikuldade sira-ne’e hotu, komisaun G rekomenda ba Ministériu Edukasaun (ME) atu iha futuru reve fali manual merenda eskolár.
Komisaun G mós rekomenda ba ME atu serbisu hamutuk ho Ministériu Administrasaun Estatál (MAE) hodi haree ba implementasaun merenda eskolár, tanba aula hahú ona maibé to’o agora merenda eskolár seidauk la’o.
Enkuantu, relatóriu fiskalizasaun ne’e diskute iha reuniaun komisaun iha loron 18 fulan-marsu 2024 no hetan aprovasaun ho votu a-favór neen (6) no kontra ho abstensaun zero, iha reuniaun plenária PN iha loron 25 fulan Marsu 2024, meza PN distribui ona hodi haruka mós kópia ba ezekutivu liuliu parte relevante atu tau atensaun.
Jornalista : Nelson de Sousa
Editór : Cancio Ximenes
