iklan

BAUCAU, HEADLINE, MUNISÍPIU, SAÚDE

Responsável saúde Baguia rekomenda aumenta harii fasilidade saúde iha reuniaun asembleia postu

Responsável saúde Baguia rekomenda aumenta harii fasilidade saúde iha reuniaun asembleia postu

Xefe Sentru Saúde Baguia, José Alves. Imajen Agência TATOLI/Natalino Belo.

BAUCAU, 27 marsu 2024 (TATOLI) – Responsável saúde liuhosi reuniaun asembleia postu administrativu rekomenda atu aumenta harii tan fasilidade saúde iha postu administrativu Baguia.

Xefe Sentru Saúde Baguia, José Alves esplika, fasilidade saúde ne’ebé oras ne’e eziste iha Baguia la sufisiente tanba seidauk hakbesik ba komunidade no relasiona ho populasaun ne’ebé barak no maioria sei hela dook hosi sentru no postu saúde.

“Bazeia ba realidade sira-ne’e entaun iha fulan-fevereiru ita rekomenda ona ba administradór liuhosi reuniaun asembleia postu administrativu,” Xefe sentru saúde Baguia hateten iha Sentru Konvensaun Baucau (CCB, sigla portugés) Vila Antiga, kuarta ne’e.

José Alves, fundamenta, fasilidade saúde sira iha Baguia seidauk sufisiente tanba foin establese sentru saúde ida no postu saúde haat hanesan Larisula, Osso-Huna, Lavateri no Samalari.

Nune’e liuhosi reuniaun referidu parte responsável saúde hato’o rekomendasaun no hetan ona aprovasaun atu aumenta fasilidade saúde liuliu iha área rurál ka kategória nu’udar izoladu hanesan harii tan postu saúde iha suku Hae-Coni, Afaloicai no Baboru inklui Ba-afa iha suku Uacala.

“Presiza harii postu tratamentu atubele asegura atendimentu dignu ba ita-nia komunidade, ami tama mak konstrui postu tratamentu iha suku sira dook hosi sentru saúde Baguia,” José Alves akresenta.

Sentru saúde postu administrativu Baguia iha sentru saúde ida no postu saúde haat hanesan postu Larisula, Osso-Huna, Lavateri no Samalari ho totál funsionáriu hamutuk 46, komposta hosi funsionáriu permanente 43 no kontratadu na’in-tolu ne’ebé halo atendementu saúde ba suku 10 hosi aldeia 45 ho populasaun hamutuk 15.228.

Notísia relevante: Sentru Saúde Baguia kontinua menus pesoál saúde

Jornalista : Natalino Belo 

Editór        : Evaristo Soares Martins

iklan
iklan

Leave a Reply

iklan
error: Content is protected !!