VIQUEQUE, 28 marsu 2024 (TATOLI)-Koordenadór Grupu Hadomi Osan, husi suku Uma-Uain Kraik, postu administrativu Viqueque Vila, munisípiu Viqueque, Oscar Marques, informa, atividade ortikultura ne’ebé sira halo ne’e fó benifísiu direta ba abitante sira-ne’ebé envolve iha grupu referidu.
“Ami-nia atividade ortikultura ida-ne’e fó rendimentu direta ba ami ida-idak. Nune’e ami-nia tempu kada loroloron konsentra de’it ba kuda modo no rezultadu lori ba merkadu”, Oscar Marques, hateten ba Agência TATOLI,I.P, iha suku Uma-Uain Kraik, ohin.
Ho atividade ne’e, nia dehan kafa loron bele hetan rendimentu hosi modo mutin hetan $50, kankung $25 no fore talin kuu $30 ba leten.
“Modo sira-ne’e ami faan tuir estrada no negosiante balun mai direta sosa iha ami-nia kantadeiru. Bainhira ema sosa hotu ami-nia modo sira-ne’e, ami kontinua hamoos no kuda fali. Uluk ami la halo atividade ida-ne’e ami hetan osan susar, maibé ho atividade ida-ne’e fasil ba ami hodi hetan osan”, nia relata.
Grupu Hadomi Osan hahú hari’i iha tinan 2021 ne’ebé foku ba atividade ortikultura hodi modo ho tipu oin-oin hanesan kankung, brinjela, baria, modo mutin, fore-tali no kada kantadeiru ida nia naruk mentru 12×4 no fini modo musan apoia hosi Catholic Relief Service (CRS-sigla inglés).
Tuir planu grupu referidu hakarak halo tan espasaun ba atividade ortikultura hodi kuda tan ai-fuan hanesan pateka no ai-fuan sira seluk hodi reforsa ekonomia membru sira-nian.
Daudaun membru grupu na’in-26 kompostu husi feto na’in-17 no mane na’in-9.
Rendimentu sira-ne’e bele nesesita ona membru sira hodi sira atende nesesidade uma-laran no balun selu labarik sira-nia eskola no osan balun membru sira rai fali iha grupu laran hodi fó impresta ba ema.
Molok ne’e, Jestór Rejionál ASIA husi CRS, Marc D’Silva, vizita direta ba Grupu Hadomi Osan no haree atividade sira-ne’ebé fó benefísiu ba abitante sira.
Programa CRS fó ona kapasitasaun ba grupu komunitáriu 98 hodi hasa’e sira nian koñesementu iha área ortikultura liuliu kuda modo no tein mina nuu.
“Bazeia ba ami-nia vizita ba grupu otikultura ne’ebé ami apoia liuhusi kapasitasaun ekipamentu no fini modo musan ba grupu sira iha munisípiu Viqueque, ami haree hotu la’o di’ak no atividade sira-ne’e benifisia duni ba sira no nia família. Tanba ne’e, ami sei kontinua implementa ami-nia programa iha Viqueque hodi tulun ita-nia abitante sira”, nia kompromete.
Notísia relevante:Autoridade Viqueque enkoraja grupu agrikultura Uatulari atu badinas kuda modo
Jornalista : Vitorino Lopes da Costa
Editór : Florencio Miranda Ximenes
