LIQUIÇA, 28 marsu 2024 (TATOLI) – Padre Yositaka Peter Ura, SJ, husu ba sarani katólika hotu iha Timor-Leste liuliu iha Suku Ulmera,Postu Administrativu Bazartete, Munisípiu Liquiça, atu perdua malu no hadomi malu, hafoin hakat ba festa páskua.
“Paskua atu hametin ita nia fiar nu’udar sarani katólika, ita tenke fó perdua ba malu antes ita tama ba festa páskua,” Padre Ura katak iha omília durante prezide misa kinta-feira Santa iha kapela Neran Ulmera, ohin.
Tanba Kinta-feira Santa nu’udár loron dahuluk ba festa páskua ninian, tanba ne’e iha loron ne’e sai hanesan konvite ida ba sarani sira hotu atu ida-idak hanoin fali ba hahalok sira-ne’ebé halo ona durante ne’e.
“Iha kinta-feira santa ne’e Jesus Kristu hatudu moris foun no domin ba rai-klaran liuhosi han hamutuk dala ikus no fase eskolante sira-nia ain”.
Amu ne’e haklaken selebra páskua nu’udar kultura ema Judeu-sira nian ne’ebé kada tinan sempre halo no oho bibi-oan hodi haan ho paun no bibi nia ran kose kada ema ida-idak nia odamatan, tuir tradisaun Judeu nian.
“Hela loron rua atu tama ba festa páskua, Jesus fase nia eskolante sira nia ain, inklui Judas Eskariote ne’ebé ikus nia mak faan Jesus ba ema aat sira hodi oho Jesus. Durante fase eskolante sira nia ain hanesan mós kalan ikus ba Jesus han ho nia eskolante sira, tanba nia hatene ida-ne’e mak nia han ba dala ikus no nia sei la oho bibi-oan no nia rasik mak sai bibi-oan hodi kasu mundu nia sala,” afirma Amu Ura.
Tanba ne’e, Padre husu ba ema hotu atu buka hadomi malu iha loron páskua ne’e, tanba domin mak Maromak presiza.
“Tenke fó domin ba malu iha páskua ida ne’e, hadomi malu ho ita nia maluk sira ne’e mak Nai-Maromak hakarak,” katak.
Notísia relevante: Domingu Ramos: haraik aan no hadomi malu mak dalan simu prezente hosi Jesus
Jornalista: Hortencio Sanchez
Editór: Florencio Miranda Ximenes
