DILI, 24 marsu 2024 (TATOLI) – Arsebispu Akerdiosese Metropolitana Dili, Dom Virgílio Kardeal do Carmo da Silva, SDB, hatete, Jesus prezente iha ema ki’ak liuhosi nia haraik aan no hadomi mak hamutuk ho jesusu sakrifika aan, terus no mate iha kruz.
“Buat ne’ebé ema iha la’ós sasukat ksolok moris nian, maibé maromak nia domin ba ita, grandeza moris ne’e nian mak haku’ak domin Maromak nian. Dala barak ita lakon domin ida-ne’e. Iha kruz Maromak haraik aan no ki’ik liu hotu. Ho grasa Maromak nian, ita mos komprende katak ema terus, ita hakbesik aan ba sira ne’e, ita bele hakesik ba Jesus rasik. Iha Jesus ita hare ema ki’ak, moras, dadur no sira barak ne’ebé ema kondena”, Bispu Vírgílio Kardeal hatete liuhosi omília iha misa domingo Ramos, iha Katedrál Dili.
Iha selebrasaun Domingu Ramos ne’e, Arsebispu Dili ne’e afirma ramos ne’e ema manán ka hetan vitória ida ne’ebé mai hosi aikruz.
“Ramos ho kruz ita labele haketak iha ita ema nia moris. Ita hahú daudaun semana santa, mai ita foti matan ba kruz, atu ita loke ita nia aan ba Nia. Hanesan são Francisco de Assis fihir ba kruz no kontempla hedi iha kruz, nia haree Maromak nia domin bo’ot ba ita”.
Kardeal husu ba ema hotu loke nia aan ba Jesus atu bele moris, basa buat kmanek no susesu moris ida ne’e nian, la’òs hosi sasan barak, maibé iha Maromak nia domin.
Maromak hadomi tebes ema hotu, tanba se Maromak la hadomi, Nia la haruka nia oan Jesus mai terus no mate ba iha mundu.
Don Virgílio Cardeal dehan tan ema idaidak folin tebes iha Maromak nia matan. “Ita ema bele haree malu folin laek, maibé iha Maromak nia matan folin tebes. Tanba folin ne’e mak fó aan tomak ba mate. Loron ida neé atu hanoin konaba Maromak nia domin ba ita, atu hatene sukat ita nia liafuan, foti liman ba ema seluk, hanoin lai, nia Maromak hadomi nia fó aan ba mate, tamba sa ha’u laiha domin ba ha’u nia maluk sira”.
Arsebipsu Metropolitánia Dili ne’e refere bainhira ema hotu rona Jesus nia paixaun ka ho liafuan seluk haree Jesus nia terus no mate iha kruz mak sentimentu interiór ne’ebé akompaña iha semana santa tomak ne’ebé, ohin hahu.
Kardeal ne’e husu ba sarani hotu atu labele admira de’it ba Jesus, maibé tenke halo tuir Jesus nia ezemplu sira. Saida mak bele aprende ho Jesus iha Paskua.
“Jesus hili dalan ida ne’bé aas tebes liuhosi Nia haraik aan. Jesus simu terus no mate. Hanesan São Paulo hateten, Nia hamate aan, halo aan hanesan ki’ik. maske Maromak hala’o aan ki’ik no ki’ak saida mak ita haree. Liafuan ne’ebé halo aan ba mane,” Amo refere
“Umillasaun sira ne’e, tanba ita ema, nune’e atu ultrapasa mizeria ema nian, lahusik ema mesak, dalan atu rekupera no salva, Jesus hedi ba kruz hodi tama iha ema nia realidade no soi ita idaidak nia terus no sala. Jesus koko iha nia isin ita ema nia moras. Iha ita nia susar no terus, Maromak nafatin ho ita”.
Iha selebrasaun selebrasaun ramos ne’e ema manan, vitoria ida ne’ebé mai hosi aikruz, tan ne’e, “ramos ho kruz ita labele haketak iha ita ema nia moris. Ita hahu dadaun semana santa, mai ita foti matan ba kruz, atu ita loke ita nia aan ba Nia. Hanesan são Francisco de Assis fihir ba kruz no kontempla hedi iha kruz, nia hare Maromak nia domin bo’ot ba ita”.
iha ita no iha semana ida ne’e ita selebra di’a atu ita kuda Maromak nia domin iha ita idaidak nia fuan.
Jornalista Jesuína Xavier
Editor: Florencio Miranda Ximenes
