iklan

HEADLINE, POLÍTIKA

Vise-PM Assanami orienta inspetór-auditór kontinua akompaña no avalia servisu Governu

Vise-PM Assanami orienta inspetór-auditór kontinua akompaña no avalia servisu Governu

Vise Primeiru-Ministru, Ministru Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino.Foto Tatoli/Antonio Daciparu

DILI, 28 marsu 2024 (TATOLI) –Vise-Primeiru Ministru, Ministru Kordenadór Assuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino, orienta auditór no inspetór sirs atu akompaña servisu Governu hahú husi inisíu hodi fó hanoin atu servisu la’o di’ak, nune’e bele presta servisu ne’ebé kualidade hodi lori dezenvolvimentu ba povu no nasaun.

Tuir nota komunikadu ne’ebé Agência TATOLI, I.P asesu katak orientasaun ne’e, Vise-Primeiru Ministru halo hafoin partisipa enkontru trimestrál auditór no inspetór sira  ho Tema  “Papel Auditoria no Inspesaun Hodi Garante Servisu Administrasaun Públiku Ne’ebé Kualidade Transparante no Imparsiál”, iha auditóriu Politéknika Hera.

Iha intevensaun Vise-PM, hatete,  enkontru ne’e importante hodi hamutuk avalia servisu Governu ho di’ak liután.

“Ema rihun 300 mak mate ba rai ida ne’e hafoin bele hetan idenpendénsia no defende rikusoin sira, maibé hafoin ukun an Estadu depende de’it ba fundu Mina-rai. Tanba ne’e inspetór no Auditór interna sira importante atu asegura implementasaun servisu ho kualidade ho objettividade,” tenik Vise PM Assanami.

Nia hatutan: “Auditór no inspetór sira la’ós de’it haree tuir ezekutivu sira depois mak avalia iha loron ida ikus bainhira mandatu hotu ona, maibé tenke akompaña hosi inisíu planeamentu ne’e loos ka la’e, no imi tenke kontribui fó hanoin, planu sira ne’e tuir duni padraun, tuir duni vizaun jerál Estadu ne’ebé hatuur ona iha Planu Estratéjiku Dezenvolvimentu Nasionál, hatur ona iha programa Governu tinan lima, no kada tinan ne’ebé atubele atinje”.

Alende ne’e haree mós movimentu rekursu umanu, orsamentu, ho nia implementasaun, envolvimentu inspetór no auditór sira hahú kedas inisíu fó hanoin la’ós de’it hatudu rezultadu mak kurize, maibé haree atu servisu sira la’o ho efisiénsia no efikásia tanba responsabilidade Timor hotu nian.

Tanba ne’e, Vise-Primeiru Ministru  orienta Komisaun Funsaun Públiku (KFP), atu halo mós diagnosa ida ba funsaun públiku tomak ne’ebé sai hanesan mákina Estadu nian ne’ebé forma ho méritu, professionál ho integridade.

Partisipa iha enkontru trimestrál ne’e, Vise-PM ASSANAMI, Magnífiku Reitór UNTL ho nia estrutura no, Auditór no Inspetór interna ministeriu sira.

Notísia relevante: Auditoria no Inspetoria Seidauk La´o ho Efisiente

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!