DILI (TATOLI)—Prezidenti Komisaun Funsaun Públiku, Faustino Cardoso observa, Serbisu auditoria no inspetoria efetivu maibé seidauk la´o ho efisiente tan ne’e Komisaun Funsaun Públiku (KFP) hala´o workshop ho objetivu halo análiza ba situasaun inspetoria no auditoria hosi ministériu hotu-hotu ne´e la´o to´o ne´ebé ona.
“Serbisu auditoria no inspetoria efetivu maibé seidauk la´o ho efisiente. Tanba ne´e, objetivu prinsipál hosi workshop ne´e buka halo análize no kompriende problema ne´e iha nebe, forsa saida maka iha tiha ona, ita nia alkansu saida maka iha tiha ona, saida maka ita seidauk alkansa, dezafiu saida maka ita hasoru hela no oportunidade saida maka ita iha,” Prezidenti Komisaun Funsaun Públiku, Faustino Cardoso hateten kestaun ne´e ba jornalista sira iha fatin hala´o workshop, Palásiu Prezidénsia Repúblika, Bairu-Pité, Dili, kuarta ne´e.
Nia haktuir serbisu inspetoria no auditoria en-jerál ne´e seidauk efetivu tanba iha situasaun lubun ida ne´ebé maka hasoru, hanesan seidauk iha definisaun didi´ak kona-ba serbisu auditoria ne´e saida, dalabalun ema seidauk hatene kna´ar auditoria ne´e saida no kuñesementu limitadu.
“Dalabalun meius atu hala´o serbisu ne´e maka laiha, dalanbalun meius serbisu iha maibé koordenasaun laiha. Signifika, ita presiza hanoin lisuk took tipu koordenasaun ne´e saida no ne´e nu´udar oportunidade ida ne´ebé maka sira hotu túr hamutuk hodi buka identifika parte forsas, frakezas, oportunidade no dezafiu sira ne´ebé maka hasoru iha serbisu inspetoria no auditoria,” Cardoso haklaken.
Nia salienta presiza kapasita liu-tan inspetór no auditór sira no bainhira halo kapasitasaun, presiza mós haree ba iha efisiénsia. Ne´e duni, tuir nia, ba oin presiza kria forum komunikasaun ida entre inspetór no auditór sira nune´e bele fahe kuñesementu ba malu, fahe esperiénsia ba malu para serbisu sira ne´e sai efetivu liu-tan.
Wokrshop ne´e hala´o iha Palásiu Prezidénsia Repúblika tanba tinan ida ne´e Prezidénsia Repúblika maka asumi responsabilidade téknika organizatória kona-ba selebrasaun loron nasionál Komisaun Funsaun Públika ne´ebé sei monu iha 15 Jullu tinan ne´e.
(Jornalista: Xisto Freitas, Editór : Manuel Pinto)
