iklan

EDUKASAUN, HEADLINE

Jesus simu terus tanba Maromak tau iha nia kaba’as kasu povu nia sala

Jesus simu terus tanba Maromak tau iha nia kaba’as kasu povu nia sala

Sarani sira partisipa iha prosisaun iha sesta-feira Santa iha foho Golgota, Comoro, sesta 29 Marsu 2024. Foto Tatoli/António Daciparu

DILI, 29 Marsu 2024 (TATOLI) – Iha krús tutun molok Jesus atu hakotu ninia iis, nia husu ba Aman Maromak atu perdua ema nia sala sira hotu, tanba sira lahatene saida mak sira halo.
Vigáriu Parokiál Imaculada Conceição Balide, padre Cesár Magno iha ninia omília ba selebrasaun sesta-feira santa, iha paixaun señor nia, esplika ba sarani sira katak Jesus simu terus hotu hodi lori krús bá foho Kalváriu nia tutun to’o ikus mai ema prega nia iha krús, la’ós tanba nia sala, maibé nia entrega ninia aan tomak tanba hakarak salva ninia povu husi sala hotu.

“Nia ema ida sala-la’ek, nia ibun la hateten lia-bosok. Maibé nia simu terus sira ne’e hotu tanba Maromak tau iha ninia kaba’as, Maromak nia povu nia sala no terus hotu. Jesus simu todan sira ne’e hotu atu salva Maromak nia povu sira hotu iha mundu ne’e”, Vigáriu Cesar Magno iha nia omília iha igreja Balide, ohin.

Saserdote ne’e esplika katak Jesus simu terus no susar hotu la’ós hodi balada sira-nia raan, maibé lori nia raan rasik atu husik hela ba ninia povu iha mundu ne’e salvasaun rohan-la’ek nian. Jesus fó nia aan tomak hodi mate iha krús tanba ema ninia hahalok aat sira.

“Nia mate tanba ita-ninia frakeza sira hotu, ita-nia bosok sira, ibun ko’alia buat ida maibé hahalok hatudu oin seluk. Nia mate tanba ema nia kanteen sira ne’ebé hakarak hadau ukun, halo esplorasaun ba ema seluk. Nia mate mós atu salva ita ema husi sala”, padre ne’e afirma.

Amu César salienta katak dalabarak ema nunka hanoin sakrifísiu boot ne’ebé Jesus halo ona, ema sempre trai nafatin nia hahalok di’ak sira. “Ema sobu malu, la respeita malu, ódiu malu, oho malu no hadau malu tanba podér”.

Iha krús molok Jesus atu husik iis, nia husu nafatin ba nia Aman Maromak atu perdua ema nia sala hotu tanba sira lahatene saida mak sira halo. Moris iha tempu ohin loron, Jesus husu ba família sira iha mundu, liuliu iha Timór atu buka hadomi malu, rona malu, nune’e labele hatodan Jesus iha krús. Nia mós husu ba sarani atu lori rasik idaidak nia krús liuhusi hadomi malu no tulun-malu, nune’e bele salva mundu ne’e husi sala mortál sira.

Padre vigáriu solisita atu tempu ida ohin ne’e sarani sira tenke simu malu no respeita malu nu’udar illas Maromak nian. Jesus ne’ebé hedi ona iha krús husu ba ninia povu sira atu ukun ho loloos hodi labele haterus tan nia, nune’e maka mundu sei hetan dame atu ema hotu sei moris iha ksolok nia laran.

Iha sorin seluk, Padre pároku  Balide, Ângelo Salsinha, agradese ba Komando Jerál Polísia Nasionál Timor-Leste (PNTL) ne’ebé orienta ona ninia membru sira mai partisipa iha atividade semana santa iha igreja Balide.

“Ida ne’e foin ba dahuluk, ita-nia Polísia Nasionál Timor-Leste hamutuk 24 mak fó ona sira-nia kontribuisaun direta iha atividade semana santa hodi envolve iha ekipa avansada ba susesu atividade semana santa iha parókia Balide”.

Padre Ângelo haktuir katak iha selebrasaun Paixão do Sehor ne’e membru Polísia feto no mane envolve direta hodi lori Senhor de Morto no illas Na’in-Feto hamutuk ho sarani sira inklui grupu kategoriál sira, relijiozu no sarani sira hala’o prosisaun hadulas área parókia Balide.

“Parókia sente onradu tebes, tanba selebrasaun tinan ida ne’e úniku tebes, diferente ho tinan sira liubá kotuk. Partisipasaun membru PNTL feto no mane sira iha selebrasaun sesta-feira Santa ne’e hatudu situasaun emosionál ida ne’ebé la haree ona ba autoridade Estadu ida, maibé konsidera malu ona nu’udar kristaun ida ne’ebé merese atu hetan fatin iha eventu sira hanesan ne’e”.

Amu Ângelo konsidera katak Polísia nia serbisu la’ós de’it atu asegura lei no orden hodi atua de’it situasaun instabilidade iha rai-laran, maibé papél Polísia nian mós parte ida atu kontribui ba atividade relijioza sira.

Notísia relevante: Sesta-Feira Santa: Krús mak sinál vitória, salvasaun no domin

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!