LIQUIÇA, 29 Marsu 2024 (TATOLI)- Padre Yositaka Peter Ura SJ, hateten, krús la’ós sinál ba kastigu, maibé krús mak sinál vitória, salvasaun no domin tanba Jesus Kristu saran aan mate iha Krús hodi fó salvasaun ba ema hotu no hakbesik aan ema hotu ba Nain-Maromak.
Padre Ura haklake ne’e bainhira akompaña Sarani-katólika iha Suku Ulmera,Postu Administrativu Bazartete, Munisípiu Liquiça hala’o viasakra hosi Kasait to’o foho tutun Monserat, sesta feira ne’e.
“Ita hala’o viasakra ida ne’e nu’udar dalan krús atu manán idulujénsia,” haklaken padre Ura.
Sesta-feira santa, Amu dehan laiha domin ida mak boot liu domin ida ne’ebé fó nia isin tan de’it ema hotu nia sala.
Nune’e, husu sarani sira atu hadomi hanesan Nain-Jesus Kristu hadomi ita hodi saran nia aan ba mate iha krús.
Iha adorasaun krús ne’e, Sarani kuaze atus-resin hahú hosi labarik, joven, ferik no katuas antusiazmu tebes la’o ain maske sa’e rai lolon iha dader tuku 07:08 no to’o iha foho leten kuaze tuku 08:06. Maske loron manas kosar sulin la sente kole kontinua reza no hananu nafatin, nu’udar meiu ida hodi hametin sarani sira nia fiar ba iha Jesus.
Iha fatin hanesan, Sarani ne’ebé partisipa iha viasakra, Sónia da Costa Soares, hatete viasakra ne’e nia objetivu atu hametin liután sarani katólika nia fiar ba Jesus iha tempu kuarezma.
“Baibain viasaka ne’e hatudu demostrasaun sarani katólika nian hodi hatudu fiar ba iha Jesus,” Sónia katak.
Durante la’o ain sa’e foho lolon sente kole no kosar maibé tanba fiar iha Jesus kole sira lakon no konsege tuir viasakra to’o ramata.
“La’o sa’e mai ne’e kole uitoan, maibé nu’udar sarani katólika ida ha’u fiar ba iha Jesus kole hotu lakon. Agradese ba Jesus tanba viasakra sesta-feira santa ne’e la’o ho susesu,” nia tenik.
Viasakra iha sesta-feira santa sai nu’udar kultura ona ba sarani katólika hotu iha mundu tomak hala’o hodi hatudu sira nia domin ba Jesus ne’ebé mate iha krús santa hodi kasu mundu nia sala.
Notísia relevante: Kinta-Feira Santa: Sarani presiza perdua no hadomi malu
Jornalista: Hortencio Sanchez
Editór: Florencio Miranda Ximenes
