iklan

COVALIMA, HEADLINE

PNTL Covalima asegura másima selebrasaun misa durante semana Santa

PNTL Covalima asegura másima selebrasaun misa durante semana Santa

Sarani sira partisipa iha prosisaun iha sesta-feira Santa iha foho Golgota, Comoro, sesta 29 Marsu 2024. Foto Tatoli/António Daciparu

COVALIMA, 29 Marsu 2024 (TATOLI) – Komando Polísia Nasionál Timor-Leste (PNTL) munisípiu Covalima garante seguransa ba sarani-sira durante selebrasaun misa iha semana Santa, hahú iha kinta-feira Santa to’o iha domingu resureisaun.

“Ita fó seguransa tuir planu operasaun hodi asegura selebrasaun festa Páskoa hahú iha tempu kuarezma iha igreja no kapela. Ami fó seguransa bolu dehan siaga satu husi eskuadra hotu to’o mai iha komando”,  Komandante PNTL, Superintendente Polísia Calisto Gonzaga, hatete iha Santa Rosa, ohin.

Nia fó hanoin katak PNTL fó seguransa la’ós de’it iha festa Páskoa, maibé depoizde selebrasaun referida sarani sira bá iha tasi no fatin turistíku sira, entaun PNTL nafatin garante seguransa ba sira.

Komandante PNTL salienta katak seguransa la’ós PNTL mesak de’it mak garante, maibé ema-hotu iha responsabilidade, tanba festa Páskoa la’ós PNTL mesak mak selebra, maibé sarani tomak, nune’e tenke kuidadu no kontrola emosaun atu labele hatodan klamar. PNTL enkoraja sarani-sira bainhira fila husi misa tenke ho hakmatek.

Tuir artigu 147 iha konstituisaun RDTL,  Polísia no forsa seguransa sira sei defende legalidade demokrátika no garante sidadaun sira-nia seguransa internu, maibé sira labele iha partidu polítiku, no ba prevensaun kriminál tenke hala’o ho respeitu ba direitu umanu no lei mak sei harii rejime ba polísia nomós forsa seguransa sira seluk.

Komandu PNTL Covalima  nia  membru  100-resin ne’ebé balun destaka iha eskuadra iha postu administrativu Fatululik, Fatumea, Fohorem , Tilomar, Maucatar, Suai no Zumalai no balun serbisu iha Komandu PNTL.

Sarani Fernando Ramos observa katak Covalima-oan selebra semana santa hahú iha misa kinta-feira Santa ne’e  PNTL sira fó seguransa ne’ebé másima.

“PNTL sira hamriik kedas iha portaun Igreja Ave Maria Suai no halo pasa revista, tanba  ita selebra Jesus Kristu nia mate hanesan sarani katólika tenke halo reflesaun”, nia dehan.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!