OÉ-CUSSE, 30 marsu 2024 (TATOLI) – Prezidente Repúblika, José Manuel Ramos Horta, hamutuk ho Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, kinta ne’e apoia nesesidade bázika ba família kbiit no ema ho defisiénsia hamutuk na’in-77 iha suku Taiboko, sub-rejiaun Pante Makasar no suku Suni-Ufe, sub-rejiaun Nítibe.
Notísia relevante: Prezidente Repúblika selebra Páskua ho sarani sira iha Oé-Cusse
Prezidente Repúblika, hateten, apoia nesesidade bázika ne’e, nu’udar asaun karidade atu fó tulun família kbiit laek no ema ho defisiénsia sira, atubele sustenta nesesidade uma-laran.
Nesesidade bázika ne’ebé oferese, hanesan; foos, supermie, manutolun, mina no seluk-tán, inklui mós apoia ekipamentu salva vida ba peskadór sira.
“Aproveita tempu mai lori ajuda ruma hosi prezidente nian, hamutuk ho Prezidente Autoridade RAEOA no Governu, ida-ne’e sei la rezolve problema tanba kiak barak loos iha Oé-Cusse, maske tinan lubuk nia laran orsamentu boot loos mai halo infraestrutura, maibé fallansu boot ladún tau matan, haree pobreza nia abut, halo oinsá mak kiak barak loos, ha’u mai lá fó buat boot ba imi, la fó buat barak, tanba Estadu Governu nia obrigasaun bootliu, tinan 20-resin independénsia ona, loloos vida di’akliu,” Xefe Estadu ko’alia iha ámbitu serimónia distribuisaun ne’e.
Iha biban hanesan, Prezidente Autoridade RAEOA, Rogério Tiago Lobato, agradese tanba ho prezenza Xefe Estadu ba kbiit laek sira iha suku no aldeia lori esperansa foun tanba bele hetan apoia nesesidade bázika.
“Ita-boot nia prezensa iha-ne’e ba ami hanesan ksolok boot ida, lori esperansa mai ema-ne’ebé laiha buat ida, ema-ne’ebé kiak, ema-ne’ebé balun moras, balun saúde ladún di’ak, isin krekas tanba menus ai-han mak laiha, tanba ne’e ha’u espera katak, Prezidente bainhira fila-fali ba Dili bele hato’o buat ne’ebé Prezidente haree ba Primeiru Ministru, atubele haruka tán apoia mai iha-ne’e, atu responde ba ema sira kiak, ema sira-ne’ebé kbiit laek tebes.”
Benefisiáriu Luís Elo, hanesan ema ho defisiente iha matan, sente kontente tanba liuhosi apoia ne’e responde nesesidade família uma laran.
“Apoia ohin Prezidente Repúblika fó apoia ba defisiénsia, ne’e ha’u agradese tanba ohin loron kalan Maromak ajuda, Prezidente mós hakat mai to’o ita-nia suku Taiboko, aldeia Maquela, apoia ami hosi defisiénsia matan to’o defisiénte ain,” nia orgullu.
Entretantu, benefisiáriu ne’ebé hetan apoia sosiál ne’e, hamutuk na’in-77 maihosi hosi Taiboko no Suni-Ufe komposta hosi kbiit laek hamutuk na’in-52 no ema ho defisiénsia hamutuk na’in-25.
Jornalista: Abílio Elo Nini
Editór: Evaristo Soares Martins
