COVALIMA, 01 Abríl 2024 ( TATOLI) – Prezidente Autoridade Munisípiu (PAM) Covalima, Miguel Armada Cardoso, fó antesaun ba kargu xefia sira atu kontrola nia funsionáriu hodi presta serbisu ho kualidade no hatudu disiplina, tanba balun halimar de’it iha li’ur.
“Ita nu’udar diretór sai ezemplár ba funsionáriu-sira, nune’e sira bele banati tuir tanba realidade ha’u haree funsionáriu-sira iha serbisu fatin halimar de’it iha li’ur. Entaun, presiza atu kontrola sira” , PAM hato’o, ohin.
Miguel Armada Cardoso dehan diretór munisipál hamutuk 18 tenke hala’o knaar ho di’ak hodi kontrola nia funsionáriu-sira no labele husik livre no la halo serbisu . Aleinde ne’e, nia fó hanoin ba diretór munisipál sira atu organiza mós diresaun seluk atu halo koordenasaun serbisu importante sira no labele hanoin polítiku de’it.
Diretór Servisu Munisipál Planeamentu Integradu no Dezenvolvimentu, Carlito Barros Reis, dehan funsionáriu iha nia diresaun maioria servisu iha terrenu no nu’udar superiór kontrola sira-nia serbisu, liliu harere sira-nia pontualidade.
Diretór Servisu Munisipál Administrasaun Rekursu Umanu Covalima , José Manuel Gonçalves, informa katak funsionáriu públiku ne’ebé presta serbisu iha administrasaun Covalima iha Diretór Servisu Munisipál hamutuk 18 no iha postu administrativu hitu hamutuk 308, husi númeru ne’e na’in-34 tama iha lista idade reforma.
Notísia relevante: PAM Covalima tau importánsia ba programa haat
Jornalista: Celestina Teles
Editora: Maria Auxiliadora
