DILI, 01 abríl 2024 (TATOLI)—Embaixadór Timor-Leste ba Cuba, Nívio Magalhães, hasoru malu ho Primeiru-Ministru (PM), Kay Rala Xanana Gusmão, hodi rona mensajen ruma molok desloka semana ne’e hodi hala’o misaun diplomátika.
Iha ámbitu ne’e, Xefe Governu hato’o orientasaun polítika Timor-Leste nian no husu atu fortifika kooperasaun bilaterál entre país rua.
“Mai hasoru Primeiru-Ministru Xanana hodi hato’o agradesimentu ba konfiansa tomak husi IX Governu Konstitusionál nian ba ha’u atu hala’o knaar hanesan Embaixadór Timor-Leste ba Cuba, no ha’u mai husu orientasaun polítika hosi Xefe Governu hodi fortifika ita-nia relasaun ho Cuba iha área saúde, edukasaun no área seluk tan,” Embaixadór Nívio hateten hafoin hasoru PM Xanana, iha Gabinete Primeiru-Ministru, Palásiu Governu, segunda ne’e.
Notísia relevante : PM Xanana husu Embaixadór Singapura foun prioriza adezaun ba ASEAN
IX Governu Konstitusionál define Timor-Leste nia polítika esterna ho prinsípiu ne’ebé konsagra sentidu independénsia no soberania mak hanesan ‘Ba Timor-Leste, laiha aliadu ka inimigu, hotu-hotu sei hamutuk no amigu de’it’. Ida-ne’e sai hanesan Timor-Leste nia lema, ne’ebé sei orienta iha relasaun esterna iha konjuntura internasionál sira hodi hametin no simu nasaun hotu.
Durante enkontru, Nívio Magalhães hato’o mós agradese ba Primeiru-Ministru Xanana nia mensajen furak sira tanba Cuba la’ós nasaun foun mai Timor-Leste, tanba Cuba nia kontribuisaun ba Timor-Leste boot tebes hahú husi luta ba ukun rasik-an to’o indepedénsia, Cuba nu’udar nasaun daruak ne’ebé estabelese relasaun diplomasia ho Timor-Leste hodi apoia iha área saúde no simu Timor-oan barak hasai estudu médiku iha área oin-oin.
“Primeiru-Ministru fó orientasaun lubuk ida durante ha’u-nia mandatu atu foka mós ba área prioridade sira ne’ebé hala’o ona. Ha’u sei esforsu tomak hodi kontinua hametin relasaun rua no sei esplora oportunidade kooperasaun foun ho Cuba,” Nívio tenik.
Nívio Magalhães simu pose husi Prezidente Repúblika, José Ramos Horta iha loron kuarta (13/03), iha Palásiu Prezidensiál Bairru-Pité, hodi troka embaixadór ne’ebé ramata ona nia mandatu iha Cuba.
Jornalista : Antónia Gusmão
Editora : Julia Chatarina
