iklan

POLÍTIKA

PN hein Governu aprezenta proposta alterasaun lei CAC

PN hein Governu aprezenta proposta alterasaun lei CAC

Prezidente Komisaun A trata asuntu Justisa no Konstituisionál iha Parlamentu Nasionál (PN), Deputadu Patrocinio Fernandes. Imajen Tatoli.Nelson de Sousa.

DILI, 01 abríl 2024 (TATOLI)—Parlamentu Nasionál (PN) hein Governu aprezenta proposta-lei ba alterasaun daruak hosi lei númeru 8/2009, 15 Jullu, Komisaun Antí-Korrupsaun  (CAC, siglá portugés).

Notísia Relevante: Alterasaun lei CAC, elimina rekezitu Deputadu ¾ marka prezensa iha eleisaun

 

Prezidente Komisaun A trata asuntu Justisa no Konstitusionál iha PN, Patrocínio dos Reis Fernandes, hateten PN hein Governu haruka proposta-lei alterasaun daruak hosi leiCAC, ne’ebé semana kotuk Governu aprova iha reuniaun Konsellu Ministru (KM).

“Ha’u seidauk iha informasaun mai ona iha meza Parlamentu Nasionál. (Bainhira proposta alterasaun-lei CAC haruka ona mai PN) hala’o ami-nia knaar nu’udar lejisladór sei haree la viola tramitasaun, mak Parlamentu iha obrigasaun tenke halo andamentu tuir rejimentu ne’ebé iha,” nia hateten ba jornalista sira iha PN, segunda ne’e.

Tanba ne’e, órgaun lejisladór hein Governu submete proposta alterasaun ne’e mai ona PN mak sei fó segmentu hodi diskute no aprova.

Vise Ministru ba asuntu Parlamentár, Adérito Hugo da Costa, konfirma Governu iha tempu badak sei aprezenta proposta alterasaun daruak lei CAC ba PN.

“Reuniaun Konsellu Ministru (KM), aprova ona iha reuniaun ikus semana kotuk no agora seidauk submete ba PN,” nia hateten ba Agência Tatoli liuhosi WhatsApp, segunda ne’e.

Enkuantu, iha 27 Marsu 2024, Governu liuhusi reuniaun Konsellu Ministru (KM), aprova projetu proposta-lei, ne’ebé aprezenta husi Prezidénsia Konsellu Ministru, kona-ba alterasaun daruak hosi lei númeru 8/2009, loron 15 Jullu, Komisaun Anti-Korrupsaun (CAC, siglá portugés).

Ho alterasaun lei CAC, elimina rekezitu Deputadu ¾ marka prezensa iha eleisaun komisáriu CAC.

“Ho diploma ida-ne’e, Komisáriu sei bele eleitu ka ezoneradu ho maiória absoluta husi Deputadu sira iha Parlamentu Nasionál, no sei elemiña rekezitu katak tenke pelumenus datoluk haat ka ¾ husi Deputadu sira marka prezensa ne’ebé hala’o hela funsaun,” Vise Ministru Asuntu Parlamenár, Adérito Hugo da Costa, relata hafoin reuniaun ezekutivu, iha Palásiu Governu, fulan kotuk.

Governu halo alterasaun ba lejizlasaun ne’e tanba husik kedas CAC harii, ezijénsia husi kórum deliberativu reforsadu atu hala’o eleisaun ba Komsáriu difikulta ona prosesu eleitorál ne’ebé normál no regulár, nune’e afeta funsionamentu órgaun polísia kriminál espesializadu iha kombate korrupsaun.

Proposta-lei ne’e determina mós katak Komisáriu ne’ebé mandatu ramata ona bele kontinua hala’o ninia knaar to’o titulár foun simu pose, nune’e bele garante kontinuasaun servisu públiku no atinje misaun ne’ebé sai hanesan objetivu hodi kria CAC.

Notísia Relevante: Komisáriu CAC Sergio Hornai nia mandatu ramata iha 21 janeiru

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!