Singapura planeia rekruta Timor-oan 2.000 iha faze dahuluk
DILI, 01 abríl 2024 (TATOLI)–Sekretáriu Estadu Formasaun Profisionál no Empregu, Rogério Araújo Mendonça, segunda ne’e, hala’o reuniaun ho Embaixadór Timor-Leste iha Singapura, Alex Tilman, hodi ko’alia kona-ba kooperasaun entre país rua.
Embaixadór Alex Tilman aprezenta ba Sekretáriu Estadu, katak Singapura planeia rekruta traballadór Timor-oan hamutuk 2.000 iha faze dahuluk.
“Ita-nia traballadór sira ne’ebé sei bá, ekipa husi Singapura mai uluk fó formasaun lian inglés iha Timor-Leste, bainhira sira to’o ona iha Singapura mós, sira sei hetan formasaun lian inglés durante semana-ida. Alende ne’e iha ne’ebá mós ema barak mak ko’alia lian Malayu, ne’e duni fasil tebes atu traballadór sira kompreende,” Embaixadór hateten hafoin hasoru malu ho Sekretáriu Estadu, iha edifísiu Sekretáriu Estadu Formasaun Profisionál no Empregu (SEFOPE), Caicoli.
Notísia relevante : PM Xanana husu Embaixadór Singapura foun prioriza adezaun ba ASEAN
Nia fundamenta tan katak, inisiativa rekrutamentu ne’e tanba Singapura haree esperiénsia husi traballadór Timor-oan sira ne’ebé bá serbisu iha Austrália no Koreia Súl, ho nune’e hakarak loke dalan ba Timor-oan sira.
Empregadór sei responsabiliza traballadór nia alojamentu sira durante estadia iha Singapura.
Iha biban hanesan, Sekretáriu Estadu Rogério, otimista katak traballadór Timor-oan sira bele adapta ho lian.
“Singapura kuaze ko’alia lian inglés ho lian Melayu, maioria ita-nia joven sira barak kompreende lian inglés no Melayu, ne’ebé preparasaun ba formasaun lian rua ne’e no mobilizasaun ba traballadór SEFOPE preparadu,” nia akresenta.
SEFOPE durante ne’e fasilita traballadór Timor-oan sira bá serbisu iha nasaun Austrália, Koreia Súl no Japaun.
Jornalista : Antónia Gusmão
Editora : Julia Chatarina
