BOBONARO, 02 abríl 2024 (TATOLI)-Ministeriu Saúde (MS), tersa ne’e halo enkontru advokasia nível rejionál ho Autoridade Munisipál Bobonaro no entidade relevante sira hodi partilla informasaun kona-bá medida prevensaun hasoru virus Rabies.
Hafoin enkontru, Ministériu Saúde no Autoridade Munisipál hamutuk ho Diresaun Servisu Munisipál Agrikultura, deside estabelese Komisaun ka ekipa Task Force ida ho totál pilar ualu (8) atu kontrola no partilla informasaun ba komunidade sira hodi hadook-an hosi moras, tanba munisípiu Bobonaro iha lina fronteira rai-maran ho nasaun Indonézia neʼebé fasil tebes virus ne’e atu halo transmisaun.
Notísia relevante: Kazu asu tata ema iha Oé-Cusse sa’e ba 40
Diretora Jerál Kuidadu Saúde Primária hosi Ministériu Saúde, Elisabet Leto-Mau, informa, governu hari ona komisaun ida, neʼebé lidera hosi Vise Ministru Saúde ba Asuntu Fortalesimentu, ho nia komisaun 10 neʼebé iha papél idak-idak atu haree ba moras ne’e.
Komisaun ne’e eziste ho razaun Timor-Leste rejista ona ona ema na’in-33 iha Rejiaun Administrativa Espesiál Oe-Cuse Ambeno (RAEOA) konfirmadu pozitivu virus Rabies hafoin asu tata. Hosi númeru ne’e iha fulan kotuk joven feto ida hakotu iis iha Hopsital Nacional Guido Valadares, Dili.
Diretora Elisbet, esplika atu kombate virus ne’e Ministériu Saúde no Ministériu Agrikultura, Pekuária Peska no Floresta mesak labele, ne’e duni presiza esforsu hosi parte autoridade munisipiu no líder komunutária sira atubele konsiensializa komunidade sira hadook-aan hodi moras Rabies.
“Ita hotu nia responsabilidade, mai ita luta hamutuk hapara tiha moras ne’e, família no ba komunidade sira importante tebes, tanba moras ida ne’e ita dehan Covid haree kedas, maibé Rabies lae. Dalaruma asu tata ita kanek, dehan di’ak hela, la espera iha seman ida liu no fulan ida ka rua mosu mai, ita susar atu atende,” nia hato’o kestaun ne’e iha salaun enkontru Kámara Ekleziástika Dioseze Maliana tuan.
Diretóra ne’e apela ba komunidade sira katak, bainhira asu teta ema ruma tenke halai lalais ba fasilidade saúde nune’e ekipa sira bele halo kedas intervensaun.
“Ita-nia vasina sira ne’e mai hotu ona, neʼebé bainhira asu tata atu labarik-ki’ik, ema boot, ferik-katuas tenke hato’o atu nune’e simu kedas vasina, tanba moras ne’e fó perigu mai ita-nia vida,” nia fó hanoin.
Sorin seluk, Diretór Agrikultura Munisípiu Bobonaro, Longuinhos João, reforsa, presiza hariis duni komisaun ne’e tanba durante ne’e ekipa vazitór halo vasinasaun iha terrenu animál na’in no líder komunitária balun ladún koopera.
“Ida-ne’e mak problema, maibé ami muda ona estratéjia iha segunda faze ne’e, envolve pesoál sira iha kada suku ne’e ema na’in-lima atu la’o hamutuk ho ekipa vasinadór nune’e bele sai matadalan nune’e asu no animál sira ne’e bele hetan hotu vasinasaun,” nia katak.
Biban ne’e, Sekretáriu Autoridade Munisipál Bobonaro ba Asuntu Sosiál, Júlio Carvalho Caeiro, apela ba líder komunitária sira hakbesik-aan ba baze hodi fahe informasaun ba komunidade sira atu moras ne’e labele halo transmisaun.
“Ha’u hanoin virus Rabies ne’e la difisil ita atu prevene, imi-nia asu iha uma, bolu ema ba vasina, lalika ema ba dehan ha’u lakoi, tanba agora ita hasoru dezafiu barak, moras ida seidauk hotu, ida mai tan,” nia fó hanoin.
Tuir dadus ne’ebé Tatoli asesu katak, animál iha munisípiu Bobonaro neʼebé hetan ona vasinasaun antirabiótika iha faze dahuluk ho totál asu 4,817, busa 150 no lekirauk 30.
Enkuantu dadus ne’e rekolla hosi suku sira besik iha fronteira ne’ebé pertense ba postu administrativu Balibo, Maliana no Lolotoe no extende tán ba faze daruak iha suku hanesan; Holsa, Saburai, Tapo-Memo, Leo-Hitu, Leo-Lima, Cowa, Batugade no Sanirin, ne’ebé ninia dadus sei iha proseu elaborasaun.
Notísia relevante: MS apela populasaun labele han naan-asu evita infesaun virus Rabies
Jornalista: Sérgio da Cruz
Editór: Evaristo Soares Martins
