DILI, 28 marsu 2027 (TATOLI)–Ministériu Saúde liuhosi Diretora Nasionál Edukasaun no Promosaun iha Ministériu Saúde, Emília de Jesus Mendonça, apela ba populasaun atu labele han naan-asu temporariamente atu evita infesaun vírus Rabies ba ema.
Notísia Relevante: Vítima 29 ne´ebé asu tata iha Pasabe-Oésilo simu ona vasina Rabies
“Evita han naan asu, tanba virus Rabies hosi asu makaas. Vírus ne’e hamate ema. Temporariamente labele han naan asu, hodi hein Governu deklara Timor-Leste livre hosi virus Rabies mak bele konsome fali naan-asu,” Diretora Emília de Jesus Mendonça hateten ba Agência Tatoli, iha Caicoli, kuarta ne´e.
Nia dehan, bele han naan-asu bainhira tein tasak ho grau 100 ne’e vírus mate ona, maibé transmisaun mós fasil bainhira oho asu no prepara ba tein naan-asu ne´e.
“Maibe tauk iha preparasaun hodi tein, tanba vírus ne’e bele transmite liuhusi ema nia liman kanek,” nia dehan.
Se populasaun konsome naan-asu mak afeta ba moras Rabies (Raiva), maibé hela iha área rurál ruma no laiha transporte, oinsá mak bele lori ba fasilidade saúde sira halo tratamentu o lalais.
Nia hateten, virus Rabies ne´e da´et on aba ema-nia isin-lolon no tama on aba kakutak ne´e, labele kura no bele hamate ema ho lalais, tanba ne’e sujere di’ak-liu evita han naan-asu iha tempu agora ne´e.
Nia esplika, transmisaun vírus ne’e mós liuhosi raan, bainhira ema oho no prepara tein no bainhira fase liman la moos no kaer ba ibun, matan ka kaer fali hahan seluk hodi han ne´e mós bele transmite virus ba isin-lolon.
Virus Rabies ne’e afeta asu nia kakutak no domina asu nia isin-lolon hodi transmite liuhusi kabeen no transmite ba ema bainhira asu ne´e tata ema.
Notísia Relevante: Timoroan ida mate ho virus Rabies iha HNGV
Jornalista : Jesuína Xavier
Editór : Cancio Ximenes
