DILI, 02 abríl 2024 (TATOLI)—Embaixadora Timor-Leste ba Komunidade Lian Portugés (CPLP, sigla portugés), Laura Abrantes, hasoru malu ho Primeiru-Ministru (PM), Kay Rala Xanana Gusmão, ne’ebé iha biban ne’e Xefe Governu husu atu estabelese kooperasaun importante haat ho país belun sira.
“Papel embaixadora nian iha CPLP, hosi orientasaun sira ne’e atu haree, purtantu, tenke halo leitura ida ba país membru, Estadu membru CPLP, depois apreende, haree, halo analiza saida mak ita bele iha kooperasaun ita bele halo. Tanba iha pilár haat importante, ne’ebé sai hanesan misaun embaixadora nian reprezenta Timor-Leste ba CPLP Embaixadora hateten hafoin reuniaun ho PM, iha Palásiu Governu, tersa ne’e.
Pilár importante sira ne’e mak komité konsertasaun polítika permanente, divulgasaun ka difuzaun lian portugés, kooperasaun ein termu área setór ne’ebé haree husi estudu sira entre nasaun membru CPLP ho Timor-Leste, pilár ikus liu mak komérsiu emprezárial.
Notísia relevante : Nivio Magalhães sai embaixadór Cuba no Laura Abrantes CPLP
Xefe Ezekutivu husu Embaixadora atu tau a’as no promove interrese polítika no ekonomia, edukasaun no asuntu prioridade seluk tan ho CPLP.
“Ne’e onra ida hanesan Embaixadóra Timor-Leste ba CPLP, iha obrigasaun atu mai fó hatene no ko’alia ho Primeiru-Ministru, husu orientasaun. Buat sira ne’ebé maka halo misaun ida hanesan reprezenta país Timor-Leste junta CPLP nian. Xefe Governu orienta ein termu polítika diplomasia, ekonómikamente, no edukasaun tanba asuntu sira ne’e nu’udar prioridade,” nia akresenta.
Embaixadora konsidera mensajen polítika no motivasaun hosi Xefe Governu importante hodi orienta durante hala’o misaun ho susesu.
Laura Abrantes simu pose husi Prezidente Repúblika, José Ramos Horta iha Palásiu Prezidensiál Bairru Pité, iha marsu tinan-ne’e. Tuir planu fulan-ne’e, Embaixadora Laura sei arranka bá Portugál hodi hala’o ninia knaar.
Jornalista : Antónia Gusmão
Editora : Julia Chatarina
