iklan

DILI, POLÍTIKA

PN seidauk simu proposta alterasaun lei CAC husi Governu

PN seidauk simu proposta alterasaun lei CAC husi Governu

Prezidente Parlamentu Nasionál, Maria Fernanda Lay. Imajen Tatoli/Francisco Sony

DILI, 02 abríl 2024 (TATOLI)—Prezidente Parlamentu Nasionál, Maria Fernanda Lay, konfirma katak, to’o tersa ne’e seidauk simu proposta-lei ba alterasaun daruak hosi lei númeru 8/2009, 15 Jullu, Komisaun Antí-Korrupsaun (CAC, siglá portugés) husi Governu.

Notísia Relevante: PN hein Governu aprezenta proposta alterasaun lei CAC

Nia dehan, mezmu semana kotuk Governu liuhusi reuniaun Konsellu Ministru (KM) aprova alterasaun daruak hosi lei CAC, maibé to’o ohin loron Governu seidauk submete mai PN.

“Prezidente ne’ebé substitui ha’u-nia auzénsia, ha’u seidauk rona nia hateten buat ida, embora jornalista sira ko’alia, tanba presiza atu halo alterasaun kala’e, hau seidauk hatene intensaun Governu nian, embora pronúnsia ona iha Konsellu Ministru,” nia hateten ba jornalista sira iha PN, tersa ne’e.

Nune’e, nia parte seidauk hatene intensaun Governu ba alterasaun lei CAC, nune’e hein Governu bele submete ba órgaun lejislativa ne’e iha tempu badak.

Rekorda fali katak iha 27 Marsu 2024, Governu liuhusi reuniaun Konsellu Ministru (KM), aprova projetu proposta-lei, ne’ebé aprezenta husi Prezidénsia Konsellu Ministru, kona-ba alterasaun daruak hosi lei númeru 8/2009, loron 15 Jullu, Komisaun Anti-Korrupsaun (CAC, siglá portugés).

Ho alterasaun lei CAC, elimina rekezitu Deputadu ¾ marka prezensa iha eleisaun komisáriu CAC.

“Ho diploma ida-ne’e, Komisáriu sei bele eleitu ka ezoneradu ho maioria absoluta husi Deputadu sira iha Parlamentu Nasionál, no sei elemiña rekezitu katak tenke pelumenus datoluk haat ka ¾ husi Deputadu sira marka prezensa ne’ebé hala’o hela funsaun,” Vise Ministru Asuntu Parlamenár, Adérito Hugo da Costa, relata hafoin reuniaun ezekutivu, iha Palásiu Governu.

Governu halo alterasaun ba lejizlasaun ne’e tanba husik kedas CAC harii, ezijénsia husi kórum deliberativu reforsadu atu hala’o eleisaun ba Komsáriu difikulta ona prosesu eleitorál ne’ebé normál no regulár, nune’e afeta funsionamentu órgaun polísia kriminál espesializadu iha kombate korrupsaun.

Proposta-lei ne’e determina mós katak Komisáriu ne’ebé mandatu ramata ona bele kontinua hala’o ninia knaar to’o titulár foun simu pose, nune’e bele garante kontinuasaun servisu públiku no atinje misaun ne’ebé sai hanesan objetivu hodi kria CAC.

Jornalista : Nelson de Sousa

Editór         : Cancio Ximenes

iklan
iklan

Leave a Reply

iklan
error: Content is protected !!