iklan

NASIONÁL, HEADLINE, POLÍTIKA

Sekretáriu Jerál ASEAN hasoru PM Xanana atualiza preparasaun sai membru plenu

Sekretáriu Jerál ASEAN hasoru PM Xanana atualiza preparasaun sai membru plenu

Primeiru-Ministru, Kay Rala Xanana Gusmão, kaer liman ho Sekretáriu Jerál ASEAN, Kao Kim Hourn, iha Gabinete Fronteira Marrítima no Terrestre, iha Palásiu Governu, tersa (02/04/2024). Imajen Tatoli/Francisco Sony

DILI, 02 abríl 2024 (TATOLI)–Sekretáriu Jerál Asosiasaun Nasaun Membru Aziátiku (ASEAN, sigla inglés), Kao Kim Hourn, hasoru malu ho Primeiru-Ministru (PM), Kay Rala Xanana Gusmão, iha tersa ne’e, hodi atualiza kona-ba preparasaun sai membru plenu, ne’ebé tuir planu sei akontese iha tinan 2025 nia laran.

Kao Kim Hourn no delegasaun hala’o vizita mai Timor-Leste iha loron segunda (01/04), ne’ebé antes ne’e hasoru malu ona ho Prezidente Repúblika, José Ramos Horta inklui entidade importante seluk tan.

“Nia Sekretáriu Jerál ASEAN nian, imi hotu hatene katak Sekretariadu ASEAN nian iha Jakarta, Indonézia. Ne’ebé nia halo vizita ida mai Timor-Leste tanba ita hotu hatene no ko’alia beibeik Timor-Leste hakarak sai membru. Ami ko’alia oitoan oin-nusa maka sai membru,” PM Xanana hateten hafoin ramata enkontru, iha Gabinete Fronteira Marrítima no Terrestre, iha Palásiu Governu.

Notísia relevante : PM Xanana atualiza rezultadu semeira ASEAN-Austrália ba Xefe Estadu

Sekretáriu Jerál asosiasaun durante hasoru malu, partilla ideia importante atu Timor-Leste prepara-an rasik hodi iha tinan mai bele sai membru planu.

“Nia mós kontente bele mai to’o iha ne’e (Timor), ita atu dehan karik katak nia okupadu tebetebes maibé mai to’o ita. Ne’e duni lori Timor-Leste no Governu nia naran agradese tebes ba prezensa Sekretáriu Jerál tanba bele mai ona vizita,” nia akresenta.

Iha biban hanesan, Sekretáriu Jerál ASEAN, Kao Kim Hourn, sente kontente bele hasoru malu ho Xefe Ezekutivu, Xanana Gusmão.

“Hau foin hasoru Primeiru-Ministru Gusmão, ida-ne’e hanesan previléjiu boot ida ba ha’u no ha’u-nia ekipa husi Sekretariadu ASEAN. Gratu boot ida ba ami tanba ami iha Dili hodi diskute kona-ba preparasaun ne’ebé mak la’o daudaun kona-ba Timor-Leste nia adezaun ba ASEAN. Klaru katak Timor-Leste iha kompromisu boot hodi sai membru plenu. Husi prosesu ne’ebé mak la’o ona, fiar katak Timor-Leste sei sai membru, klaru katak investe ona durante prosesu ne’e,” Kao Kim Hourn tenik.

Nia nota, Timor-Leste iha inisiativa no kompromisu boot hodi sai membru plenu ASEAN.

“Klaru katak ha’u sei kontinua ha’u-nia diskusaun ohin no aban, no ami hakarak oferese ami-nia apoiu tomak ho ami-nia papel nu’udar Sekretariadu ASEAN. Ha’u fiar katak nasaun membru ASEAN sira sei deside kona-ba tempu bainhira mak Timor-Leste sai membru no presiza hatudu ninia prontidaun,” nia reforsa.

Sekretáriu Jerál observa katak durante ne’e Timor-Leste serbisu maka’as desde inísiu to’o agora, hahú husi líder país sira, nível polítika no téknika sira.

“Timor-Leste iha ona faze ida preparasaun, tanba ne’e ami kontente tebes hodi haree progresu ne’ebé mak la’o daudaun no hakarak husu ba nasaun membru sira atu kontinua fó apoiu ba Timor-Leste nia preparasaun sira hodi sai membru sedu liu duke tarde,” nia dehan.

Timor-Leste antes ne’e hato’o pedidu adezaun ba ASEAN hahú hosi tinan 2011, nune’e daudaun ne’e hanesan membru observadór.

Maski Timor-Leste daudaun ne’e seidauk sai membru plenu direitu ASEAN, maibé partisipa ona eventu nível altu asosiasaun ho nasaun membru sira seluk.

Aleinde ne’e, Governu Timor-Leste liuhusi kooperasaun ho Indonézia, haruka funsionáriu hosi liña ministeriál bá Jakarta hodi halo preparasaun téknika sira hodi apreende sistema no lala’ok servisu tékniku ASEAN, hanesan meiu ida fó koñesimentu.

Iha parte seluk, Ministériu Negósiu Estranjeiru no Kooperasaun kontinua analiza kle’an kona-ba polítika no kuadru regulamentár, ne’ebé sei aprezenta ba Konsellu Ministru hodi halo aprovasaun. Nune’e mós halo elaborasaun dokumentu rejime komérsiu externu no enkuadramentu legál sira.

ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.

Asosiasaun ne’e harii iha loron 08 agostu 1967 iha Bangkok, Tailándia, ho asinatura deklarasaun ASEAN (Deklarasaun Bangkok) hosi Fundadór sira hosi Indonézia, Malázia, Filipina, Singapura no Tailándia.

Nasaun tama ASEAN tuir loron Indonézia, Malázia, Singapura, Tailándia, Filipina (08 agostu 1967), Brunei Darussalam (08 janeiru 1984), Vietname (28 jullu 1995), Laos (23 jullu 1997), Myanmar (23 jullu 1997) no Kamboja (20 abríl 1999), enkuandu Timor-Leste foin hetan estatutu nu’udar observadór no sei sai membru plenu direitu iha tinan 2025.

Iha tinan 2003, asosiasaun ne’e lansa Komunidade ASEAN bazeia ba pilár tolu hanesan Komunidade Seguransa, Komunidade Ekonómika no Komunidade Sosiál-Kulturál ASEAN.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!