iklan

HEADLINE, KAPITÁL

STAE hakarak halo rekrutamentu ba pesoál apoiu eleisaun suku

STAE hakarak halo rekrutamentu ba pesoál apoiu eleisaun suku

Logotipu STAE. Imajen/Espesiál

DILI, 02 abríl 2024 (TATOLI)—Sekretariadu Tékniku Administrasaun Eleitorál (STAE) hamutuk ho Diresaun Jerál Dezenvolvimentu Governu Lokál halo ona diskusaun hodi halo rekrutamentu ba pesoál apoiu eleisaun suku.

Diretór Jerál STAE, Elviro Fernandes Moniz, hateten, inisiativa ne’e bazeia ba dekretu-lei númeru 9/2016, ne’ebé seidauk halo alterasaun, tanba ne’e membru Asembleia meza na’in-tolu nafatin iha kompeténsia foti desizaun iha kontajen votu.

“Ita sei halo rekrutamentu ba pesoál balun kada aldeia no suku atubele fó apoiu, fasilita ka fó asisténsia ba membru meza asembleia na’in-tolu ne’e, nune’e bele halo sira-nia funsaun ne’e ho di’ak liután, ita mós aumenta tan kabina votu iha sentru votasaun sira, karik sentru votasaun ne’e sufisiente bele akomoda kabina votu to’o lima atu fasilita eleitór sira vota lalais,” Diretór Jerál informa ba Agência Tatoli, iha ninia knaar fatin, Caicoli, tersa ne’e.

Notísia relevante : STAE Covalima rejista eleitór foun 167 iha setembru

Rekrutamentu pesoál ne’e sei haree ba númeru eleitór kada aldeia no suku nian hanesan, bainhira eleitór iha aldeia ho kuantidade 1.000 ba leten sei tau ema na’in-lima, eleitór 700 ba leten sei tau na’in-haat, eleitór 400 to’o 700 tau na’in-rua no eleitór la to’o 100 la koloka ona ema tanba  prosesu vota lalais.

STAE nia prepasaun ba eleisaun agora la’o tuir kalendáriu operasionál eleisaun líder komunitáriu. Hahú kuarta (03/04), Ekipa téknika hamutuk 57 ne’ebé tuir ona Training of Trainer (ToT) sei koloka na’in-lima ba kada suku iha munisípiu haat no iha kinta (04/04) sei fó formasaun ba pesoál STAE apoiu suku.

“Iha loron 04 to’o 06 abríl sei iha sosializasaun lei númeru 9/2016 kona-ba lei suku nian, ne’ebé ita sei halo divulgasaun informasaun kona-ba operasaun eleisaun nível suku 10,” nia akresenta.

Aleinde ne’e, STAE mós imprime ona lista 1% hodi fasilita aprezentasaun kandidatura iha suku 10, hahú fahe ona desde segunda (01/04), ne’ebé hanesan baze dadus distribui ba suku no aldeia sira atu kandidatu sira bele ona prienxe hodi buka apoiante hodi kompete iha eleisaun suku.

Iha loron 08 to’o 24 abríl sei halo edukasaun eleitorál ka votante suku nomós to’o aldeia. Iha loron 09 abríl sei halo reuniaun konvokatóriu konsellu suku kona-ba konstituisaun meza eleitorál suku hodi resesaun kandidatura xefe suku.

Nune’e mós, iha loron 12 abríl sei iha reuniaun konsellu suku hodi forma meza no kontinua kedas aprezentasaun kandidatura xefe suku. Iha loron 15 to’o 21 abríl, sei imprime buletin votu xefe suku, iha loron 18 to’o 19 abríl sei realiza formasaun ba pesoál STAE apoiu aldeia no loron 22 abríl sei halo distribuisaun materiál sensitivu no naun sensitivu hosi nasionál bá munisípiu.

Iha loron 24 abríl reuniaun konvokatóriu asembleia aldeia kona-ba eleisaun líder komunitáriu, loron 26 abríl distribuisaun materiál sensitivu no naun sensitivu husi munisípiu ba sentru votasaun aldeia 52.

Iha loron 27 abríl reuniaun asembleia aldeia hodi forma meza, aprezentasaun kandidatura xefe aldeia, delegadu, delegada no kontinua kedas ho eleisaun xefe suku no aldeia delega no delegadu no ikus iha loron 28 abríl apuramentu rezultadu.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!