DILI, 03 abríl 2024 (TATOLI)—Deputadu bankada Partidu Demokrátiku (PD) iha Parlamentu Nasionál (PN), António da Conceição ’Kalohan’, hateten Primeiru-Ministru (PM), Kay Rala Xanana Gusmão, iha kompeténsia avalia dezempeñu servisu membru Governu sira-nian, karik la halo servisu ho di’ak mak sei troka ho ema seluk.
Notísia Relevante: Marsu: Xanana sei avalia dezempeñu servisu membru Governu
“Remodelasaun iha Governu dasia kompeténsia Primeiru-Ministru nian, atu haree ba ministru sira-nia dezempeñu serbisu. Ne’ebé, konserteza atu afeta PD nian ida keta fraku. No fraku duni hasai, tanba nasaun tenke ba oin, ema la’ós mak nia de’it. Ne’ebé, ita presiza ema-ne’ebé di’ak hola responsabilidade nasaun nian, ne’ebé laiha problema ho PD ida. Ida-ne’e mós la influensia liu ami-nia votu iha Parlamentu atu fó nafatin ba Governu,” nia hateten ba jornalista sira iha sala bankada PD iha Parlamentu Nasionál, kuarta ne’e.
Atuál Sekretáriu Jerál Partidu Demokrátiku (PD) ne’e hateten, PD hola responsabilidade ba Estadu, ne’ebé hamutuk ho CNRT daudaun ukun hela no lori governasaun ne’e ba to’o tinan lima.
“Agora la’o, ukun hamutuk hela. Maibé, ami tenke rekoñese sira iha forsa boot liu ami no ami hatene ami kiik mibé mai tenke hatene aan. Ami mós hola ona desizaun responsabilidade vida nasaun iha tinan lima, tanba ne’e ami tenke firme ho ida-ne’e,” nia hateten.
Antes ne’e, Vise Bankada CNRT iha PN, Deputadu Patrocínio Fernandes, hateten bankada apoiu Primeiru-Ministru (PM), Kay Rala Xanana Gusmão, ne’ebé sei halo avaliasaun iha marsu ba dezempeñu serbisu membru Governu sira-nian, karik la halo serbisu ne´e tenke tau fali ema seluk.
“Ha’u laiha komentáriu kona-ba ida-ne’e, tanba Governu ne’e kompeténsia eskluziva Primeiru-Ministru nian. Ne’ebé, Primeiru-Ministru iha kompeténsia atu halo avaliasaun ba ninia membru Governu sira-nia prestasaun serbisu, dedikasaun buat sira ne’e hotu. Serbisu refleta duni ba espetativa Governu iha para responde ba preokupasaun públiku ka lae,” vise bankada CNRT ne’e hateten ba jornalista sira iha PN.
Tanba ne’e, nia dehan, ne’e kompeténsia PM nian no bankada CNRT nu’udar bankada ne’ebé sustenta governasaun ida-ne’e, tnba ko’alia governasaun ida-ne’e Governu ne’e nia na’in mak Primeiru-Ministru no ministru sira-ne’e pesoa sira-ne’ebé PM hili atu ajuda nia.
“Tantu bankada CNRT ne’ebé atu sustenta Governu ida-ne’e konserteza nia iha nia pozisaun ida atu asegura apoia polítika tomak ne’ebé Primeiru-Ministru hola, nu’udar desizaun Estadu no polítika ba nasaun,” nia hateten.
Notísia Relevante: PR Horta sei akompaña serbisu IX Governu
Jornalista : Nelson de Sousa
Editór : Cancio Ximenes
