DILI, 03 Abríl 2024 (TATOLI) – Diresaun Nasionál Floresta, Ministériu Agrikultura, Pekuária, Peska no Floresta (MAPPF) arrekada, iha primeiru trimestre 2024, reseita hamutuk $34.552,85 ba kofre Estadu.
Diretór Nasionál Dezenvolvimentu Floresta Komunitária, Américo da Silva, relata katak reseita ne’ebé sira rekolla ne’e mai husi fonte rua mak leilaun ba ai sira ne’ebé Diresaun Floresta halo no seluk mak husi infrasaun ne’ebé komunidade sira komete tanba laiha karta lisensa bainhira tesi ai no halo esportasaun ba produtu sira.
“Husi parte lisensiamentu nian ne’ebé ita-nia komunidade sira submete dokumentu hodi sosa ai ne’ebe ita hatama ona ba prosesu leilaun maka ai-teka, gamelina, au no ai-sunu ne’e ita konsege rekolla reseita hamutuk $32.718,5 no husi infrasaun mak $1.833,75”, Américo da Silva hateten iha Caicoli, ohin.
Dirijente ne’e esplika katak husi prosesu leilaun ba iha ai-teka ho kuantidade 1.247m3 ne’e hetan osan $31.175, ai-gamelina 92m3 hetan reseita $1.380, au ho kuantidade metru 1.656 hetan osan $20.7 no ai-sunu sentímetru 23,8 hetan reseita $142.80.
Liga ba infrasaun, Diresaun Floresta rejista kazu neen, inklui esportasaun kutulák bá Indonézia (nehek-teen) ne’ebé komunidade balun iha Oé-Cusse maka organiza no hetan apreensaun husi guarda florestál sira. Infrasaun sira ne’e inklui mós tesi ai ilegál ne’ebé komete husi komunidade husi parte Liquiçá, Ermera, Aileu no Dili iha parte Metinaro.
Multa ba esportasaun kutulák ne’ebé hetan apreensaun ho kuantidade kilógrama rihun 19 hamutuk $475 no multa ba infrasaun tesi ai-sunu sentímetru 20 selu $490, au ho metru 443 selu $16.60, ai-rimba 5m3 $127.65, ai-samtuku 4,40m3 $550,10 no ai-teka 0,5m3 $175.
Américo da Silva husu ba komunidade sira atu kumpre regra ne’ebé vigora ona iha nasaun ne’e, liuliu lei sira kona-ba oinsá kuidadu ambiente no floresta sira, kuidadu ai sira ne’ebé moris iha foho-lolon sira atu labele tesi arbiru. “Bainhira hakarak tesi tenke halo karta lisensa mai Floresta, nune’e bele hetan orientasaun molok bá tesi no labele hetan apreensaun no ikus mai tenke selu multa ba Estadu”, nia hato’o.
Notísia relevante: Diresaun-Jerál Floresta arrekada reseita rihun $26-resin
Jornalista: Tomé Amado
Editora: Maria Auxiliadora
