Empreza Timorindo kontinua ona projetu dada bee-moos ba komunidade Lacluta
VIQUEQUE,03 abríl 2024 (TATOLI)-Koordenadór Bee Timor Leste, Empreza Públiku (BTL,E.P) munisípiu Viqueque, Marito da Costa, informa, empreza Timor Rindo Unip, Lda, kontinua fali ona projetu dada bee-moos ba abitante iha Postu Administrativu Lacluta, munisípiu Viqueque ne’ebé abandona kuaze tinan ida.
“Atu relata ba públiku katak daudauk empreza referidu kontinua fali sira-nia servisu no komesa distribuisaun kanu transmisaun bee nian ba iha fatin implementasaun projetu dada bee-moos iha postu Lacluta. Projetu dada bee-moos ba postu Lacluta implementa iha tinan 2023, maibé projetu ne’e paradu tinan naruk”, Marito da Costa, hateten ba Agência TATOLI,I.P, iha ninia kna’ar fatin Beloi, ohin.
Empreza ne’e kontinua projetu iha faze instalasaun kanu distribuisaun ho diametru 90,75 no 63 iha postu administrativu Lacluta.
“Ami-nia tékniku sira kontinua akompaña hodi halo monitorizasaun ba projetu dada bee-moos ne’ebé la’o iha postu Lacluta. No ami husu empreza labele abandona tan servisu”,Diretór ne’e sujere.
Tanba abitante postu Lacluta presiza bee-moos hodi asesu no obra ida-ne’e paradu kleur ba oin kada semana teknku sira kontinua ba akompaña empreza hodi labele abandona tán projetu.
“Obra dada bee-moos ba postu Lacluta ne’e tenke finaliza iha tinan ida-ne’e. Ami lakoi estende tan obra ne’e ba iha tinan oin.Bainhira projetu ramata ami komesa halo sosializasaun ba abitante sira kona-bá tarefa selu bee nian hodi hatama reseita ba Estadu”, nia afirma
Iha fatin ketak, Xefe Suku Dilór, Postu Lacluta, Jacinto Ximenes, afirma, empreza kontinua ona projetu melloramentu sistema bee-moos iha postu Lacluta.
“Agora, empreza hala’o ona sira nia-servisu komesa kanaliza kanu distribuisaun iha suku Dilór laran. Ami mós akompaña hela empreza sira-nia servisu ne’ebé la’o iha ami-nia postu liuliu iha suku Dilór”, nia afirma.Nia relata.
Molok ne’e, Diretór Empreza Timor Rindo Unip Lda, José Henrique, promete sei finaliza obra dada bee-moos ba abitante postu Lacluta.
“Durante tinan hira obra ne’e paradu tanba ami hasoru hela difikuldade finanseiru, maibé la signifika empreza haluha ninia responsavél ne’ebé Governu liuliu BTL.E.P fó konfiansa hodi hala’o projetu dada bee-moos ne’e,” nia afirma.
Daudaun ne’e, nia informa obra ne’e paradu bainhira progresu obra ne’e foin atinje 13%, maibé kontinua ona iha fulan-Marsu, nune’e progresu obra fiziku ne’e atinje ona 25%.
Projetu melloramentu sistema bee-moos ba postu administrativu Lacluta husi foho Bibileo hun ho distánsia kilométru 4,5 ho kustu $582.100. Projetu referidu fó benifísia ba abitante Lacluta ne’ebé hela iha postu Lacluta Vila, área suku Dilór ho totál populasaun 4.158 ka Uma-Kain 693.
Notísia relevante:BTL Viqueque husu empreza Timorindo kontinua projetu dada bee-moos iha Lacluta
Jornalista : Vitorino Lopes da Costa
Editór : Florencio Miranda Ximenes
