iklan

NASIONÁL, EKONOMIA, HEADLINE

KM altera rezolusaun Governu kriasaun komisaun zona dezenvolvimentu Oé-cusse

KM altera rezolusaun Governu kriasaun komisaun zona dezenvolvimentu Oé-cusse

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (03/04/2024). Imajen Tatoli/Francisco Sony

DILI, 03 abríl 2024 (TATOLI)–Primeiru-Ministru (PM), Kay Rala Xanana Gusmão, aprezenta projetu rezolusaun Governu, iha ámbitu reuniaun Konsellu Ministru (KM) kona-ba alterasaun dahuluk ba rezolusaun Governu númeru 7/2024, loron 24 Janeiru, kona-ba kriasaun Komisaun Ezekutiva ba estabelesimentu zona dezenvolvimentu ekonomia espesiál ida iha Oé-cusse Ambeno.

“Rezolusaun Governu ida-ne’e ho objetivu atu hadi’a no klarifika funsionamentu komisaun ezekutiva nian, ne’ebé iha responsabilidade hodi prepara estudu kle’an ida kona-ba implementasaun zona ekonómika espesiál ida iha rejiaun ne’e. Tanba ne’e, hahú halo klarifikasaun ba relasaun institusionál no remunerasaun membru komisaun nian, nune’e mós prosedimentu ba aprezentasaun proposta legál no relatóriu sira kona-ba kondisaun rejiaun no zona ekonómika espesiál nian,” haktuir nota ne’ebé Agência Tatoli asesu, hafoin reuniaun ezekutivu, iha Palásiu Governu, kuarta ne’e.

Notísia relevante : Autoridade RAEOA sei rekolla dadus afetadu ZEESM atu halo kompensasaun

Ho alterasaun ida-ne’e, estabelese katak Koordenadór komisaun, aleinde remunerasaun mensál ne’ebé hanesan sei simu mós suplementu hanesan ho Prezidente Rejiaun Administrativa Espesiál Oé-cusse Ambeno (RAEOA). Nune’e mós, Vise-Koordenadór sira, aleinde remunerasaun ne’ebé hanesan sei simu suplementu hanesan ho Sekretáriu Jerál sira Autoridade RAEOA nian.

Estudu kle’an ne’ebé Komisaun ne’e sei prodús tenke inklui preparasaun proposta enkuadramentu legál zona ekonómika espesiál nian ida, nune’e mós definisaun ba ninia estrutura funsionál. Komisaun ne’e mós sei responsável hodi prepara no aprezenta relatóriu ida kona-ba kondisaun rejiaun no zona ekonómika espesiál ida uluk, bainhira komisaun ne’e hahú simu pose.

Rezolusaun Governu ne’e esklarese mós katak komisaun ne’e tutela direta ba Primeiru-Ministru no Vise-koordenadór sira apoia Koordenadór iha ninia misaun, bazeia ba kompeténsia ne’ebé koordenadór delega ba sira.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!