DILI, 03 abríl 2024 (TATOLI)—Governu liuhosi reuniaun ordinária Konsellu Ministru (KM), kuarta ne’e, aprova projetu dekretu-lei kona-ba estrutura orgánika Autoridade Protesaun Sivíl (APC, sigla portugés), ne’ebé aprezenta husi Ministru Interiór, Francisco da Costa Guterres.
“Objetivu husi projetu dekretu-lei ne’e, tuir lei protesaun sivíl no orgánika IX Governu Konstitusionál maka hakarak atu define filafali estrutura orgánika Autoridade Protesaun Sivíl hodi halo prevensaun, mitigasaun no resposta ba situasaun emerjénsia no katástrofe oioin,” haktuir nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : APC no Timor Telecom asina akordu hodi divulga informasaun kona-ba dezastre naturál
APC hanesan servisu públiku ne’ebé responsável ba atribuisaun Estadu kona-ba protesaun sivíl, ne’ebé inklui territóriu nasionál hotu.
Entre ninia atribuisaun prinsipál sira foka liu ba planeamentu, koordenasaun no ezekusaun polítika protesaun sivíl nian, sensibiliza populasaun ba kestaun seguransa no koordenasaun asaun protesaun no sokorru iha situasaun emerjénsia no katástrofe.
Órgaun APC nian mak hanesan Prezidente APC, Diretór Ezekutivu no Komandante Nasionál ba Operasaun Protesaun Sivíl, ne’ebé Prezidente rasik hetan nomeasaun tuir kritériu kompeténsia téknika no esperiénsia profisionál ne’ebé relevante, no responsável ba diresaun servisu, sujeitu ba podér membru Governu nian hodi responsabiliza iha área seguransa interna no protesaun sivíl.
Atu garante resposta ida-ne’ebé efisiente no koordenada iha situasaun emerjénsia, Autoridade Protesaun Sivíl harii hanesan servisu ho ninia diresaun nasionál neen mak hanesan Diresaun Nasionál Bombeiru, Diresaun Nasionál Prevensaun no Mitigasaun, Diresaun Nasionál Emerjénsia no Resposta, Diresaun Nasionál Rekuperasaun, Diresaun Nasionál Jestaun Risku ba Dezastre no Diresaun Nasionál Jestaun Rekursu, entidade sira ne’ebé responsável ba ida-idak nia área Protesaun Sivíl no sei hala’o deskonsentrasaun servisu iha territóriu nasionál, no materializa sistema rejionál no sistema munisipál Protesaun Sivíl nian.
Bainhira Prezidente Promulga dekretu-lei ida-ne’e maka sei revoga dekretu-lei númeru 11/2022, loron 09 Marsu, kona-ba estrutura orgánika APC nian.
Jornalista : Antónia Gusmão
Editora : Julia Chatarina
