MOP sei hasai sedimentasaun iha mota Irabere bainhira udan para
DILI, 03 abríl 2024 (TATOLI)—Ministériu Obra Públika (MOP) sei hasai sedimentasaun ne’ebé nakonu iha mota Irabere, tanba sedimentasaun ne’e afeta bee sobu natar ektare 26 iha suku Irabin de Baixo, postu Uatucarbau, munisípiu Viqueque.
“Loos duni, ita-nia agrikultura iha Irabin daudaun preokupa mota Irabere ne’ebé sobu komunidade nia natar, husu atu hasai sedimentasaun, nune’e ita sei hasai maibé haree tempu udan para ona mak ita book tanba situasaun mak ita bá hasai mós hanesan, ohin hasai aban udan tun taka ka nakonu filafali ita gasta osan de’it, ne’ebé husu ita hotu nia pasiénsia oituan, udan para ami book kedan,” Ministru Obra Públika, Samuel Marçal, informa ba Agência Tatoli, iha Palásiu Governu, kuarta ne’e.
Situasaun mota sobu natar no rai monu la’ós akontese de’it iha Viqueque, maibé iha fatin barak iha territóriu Timor. Maski nune’e Governu la prevee osan sufisiente, nune’e bainhira akontese situasaun ne’e tenke haree ba prioridade.
“Daudaun projetu ne’ebé konsidera importante atu hahú halo dezeñu iha 30 resin mak iha tempu badak bele asina kontratu atu hahú serbisu, ekuantu seluk iha Ajénsia Dezenvolvimentu Nasionál (ADN) sei halo verifikasaun. Projetu 30 ne’e balun halo barreira, estrada kotu no seluk tan. Projetu balun mós sei halo preprasaun dezeñu no levantamentu dadus iha terrenu,” nia akresenta.
Notisia relevante: Laiha morru protensaun, mota Irabere sobu natar ektare 26 iha Uatucarbau
Daudaun empreza konsultór internasionál ida mak halo hela estudu ba konstrusaun ponte ne’e rasik, nune’e espera tinan ne’e ka tinan oin hotu bele tau orsamentu atu hahú mobiliza ona, inklui haree mos morru protesaun ba mota.
Jornalista : Arminda Fonseca
Editora : Julia Chatarina
