iklan

NASIONÁL, HEADLINE, POLÍTIKA

PM Xanana felisita Prezidente Indonézia eleitu Prabowo Subianto

PM Xanana felisita Prezidente Indonézia eleitu Prabowo Subianto

Kandidatu númeru 2, Prabowo Subianto ho nia Vise Gibran Rakabuming Raka. Imajen/CNN Indonesia

DILI, 04 abríl 2024 (TATOLI)–Primeiru-Ministru (PM), Kay Rala Xanana Gusmão, felisita Prezidente Repúblika Indonézia (RI) eleitu, Prabowo Subianto.

“Lori Governu no Povu Timor-Leste nia naran, ha’u hato’o parabéns ba Sua Exelénsia nia vitória nu’udar Prezidente Repúblika Indonézia. Ita-nia vitória boot iha eleisaun prezidensiál demonstra konfiansa ne’ebé povu Indonézia fó ba ita-nia lideransa no ba ita-nia vizaun, ba ita-nia nasaun nia futuru. Ha’u fiar katak ho ita-nia matenek no esperiénsia, ita boot sei sai Prezidente esepsionál no sai líder signifikante iha rejionál no globál,” PM Xanana hato’o mensajen liuhosi nota ofisiál ne’ebé Agência Tatoli asesu, kuarta ne’e.

Iha tempu agora, ho turbulénsia no mudansa iha relasaun internasionál, Indonézia dezempeña papél sentrál iha promosaun kooperasaun, toleránsia no pás.

“Ho ita-nia lideransa, Indonézia sei sai nasaun prinsipál poténsia ekonómika mundiál ne’ebé sei kontribui kresimentu ekonomia no prosperiedade iha rejiaun ne’e. Timor-Leste no Indonézia mantein relasaun bilaterál, amizade no kooperasaun idake forte. Hamutuk, ita-nia nasaun kontinua sai modelu globál iha rekonsiliasaun no podér transformadór diálogu no konfiansa,” Xefe Governu tenik.

Notísia relevante : Horta kongratula Prabowo Subianto ne’ebé hetan vitória iha eleisaun presidensiál

Xefe Ezekutivu konsidera, Indonézia nu’udar nasaun maiór parseiru komersiál Timor-Leste nian no iha lasu forte entre povu rai rua, nune’e mós iha kooperasaun iha área oin-oin.

“Ha’u hatene katak ita-nia lideransa, ita-nia relasaun bilaterál sei sai metin liután no ha’u sei hare ba oin atu serbisu hamutuk ho ita liu-liu ba interrese mútua entre nasaun rua.  Prioridade nasionál ida ba nasaun rua mak finalizasaun ba fronteira marrítima tuir direitu internasionál no bazeia ba Konvensaun Nasaun Unida kona-ba Direitu Tasi. Ida-ne’e sei fó serteza mai ita kona-ba ita-nia direitu soberanu no apoia dezenvolvimentu ekonomia mariña no konservasaun. Dala-ida tan, ha’u hato’o ha’u-nia parabéns ba vitória iha eleisaun prezidensiál. Hato’o ha’u-nia dezeju boot ba ita-nia susesu hanesan Prezidente ba futuru briliante iha ita-nia nasaun. Sua exelensia Prezidente, favór aseita ida-ne’e ba ha’u-nia konsiderasaun no ha’u-nia respeitu,” Xanana Tenik.

Komisi Pemilihan Umum fó sai rezultadu eleisaun prezidensiál Indonézia tinan 2024 iha loron tersa (20/03), ne’ebé hatudu katak kandidatu númeru 2 Prabowo Subianto no Gibran Rakabuming Raka, sai vensedór ho totál votu 96.214.691 hosi totál votu válidu 164.227.475 iha nasionál.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!