DILI, 03 abríl 2024 (TATOLI)–Timor-Leste liuhusi Gabinete Vise-Ministra ba Asuntu ASEAN, kuarta ne’e, lansa programa lideransa ida ba Timor-Leste nia foin-sa’e no líder futuru sira.
Programa Futuru Líder ba ASEAN (LBA) ne’e nia objetivu mak atu dezenvolve kapasidade foin-sa’e Timor-oan sira ho idade 23-37 hodi komprieende kona-ba ASEAN no kontribui iha esforsu ba adezaun husi setór oin-oin.
Sekretáriu Jerál ASEAN, Kao Kim Hourn, partisipa iha serimónia abertura ne’e, akompaña mós hosi Primeiru-Ministru (PM), Kay Rala Xanana Gusmão no membru Governu sira seluk.
PM Xanana hateten katak programa ne’e akontese iha momentu ne’ebé importante tebes, ne’ebé partisipa direta husi Sekretáriu Jerál ASEAN.
“Ida-ne’e la’ós de’it hanesan sinál ida husi ita-nia kompromisu ba integrasaun no kooperasaun internasionál no rejionál, maibé mós marka pasu pozitivu ida ba ita-nia jornada iha dezenvolvimenta nasionál. Ita sente onradu ho Sekretariu Jerál ASEAN ninia prezensa iha atividade importante ne’e. Ami sente orgullu ba ita-nia vizita, ida-ne’e demonstra apoiu asosiasaun nian ba Timor-Leste ninia viajen iha prosesu adezaun,” Xefe Governu hateten liuhosi diskursu, iha ámbitu serimónia lansamentu programa futuru foin-sa’e ba ASEAN, iha salaun Multiuso, GMN-TV Bebora.
Notísia relevante : Sekretáriu Jerál ASEAN hasoru PM Xanana atualiza preparasaun sai membru plenu
Primeiru-Ministru felisita partisipasaun grupu dahuluk iha lansamentu programa líder futuru Timor-Leste ba ASEAN. Eventu ne’e nu’udar momentu ida Timor-Leste komesa la’o.
“Programa ne’e hanesan investimentu ba ita-nia futuru no ba ita-nia nasaun nia futuru. Dezenvolve líder jerasaun foun importante tebes ba kualker nasaun no ba Timor-Leste ida-ne’e importante tebes ba ita-nia adezaun ba ASEAN. Programa ida-ne’e hanesan sinál ida ba ita-nia integrasaun no kooperasaun nível rejionál no marka pasu signifikativu ida ba ita-nia jornada dezenvolvimentu nasionál. Tanba-ne’e mak ita investe iha jerasaun foun nasaun nian,” Xanana akresenta.
IX Governu Konstitusional identifika dezenvolvimentu umanu mak kapitál sosiál nu’udar área prioritária ba investimentu, diversifikasaun ekonómika, dezenvolvimentu infraestrutura no boa-governasaun.
Vise-Ministra Asuntu ASEAN, Milena Maria da Costa Rangel, realsa, programa ne’e atu responde de’it ba roteiru ne’ebé fó, liu-liu prepara rekursu umanu.
“Líder foin-sa’e sira ne’e hanesan futuru, tanba ne’e mak investimentu ba futuru líder sira importante tebes hodi responde ba ita-nia ajenda dezenvolvimentu nasionál nomós responde ba ita-nia integrasaun internasionál,” nia tenik.
Líder foin-sa’e hamutuk ema na’in-100 mak liu iha prosesu aplikasaun no selesaun rigorozu. Foin-sa’e hirak ne’e mai hosi lalo’ok moris no setór oin-oin, inklui sira ne’ebé serbisu iha setór públiku, setór privadu, joven emprendedór sira, organizasaun sosiedade sivíl, akademia no ajénsia internasionál, feto konstitui 56 % husi partisipante.
Kandidatu sira hetan nomeasaun husi instituisaun oin-oin no selesionadu bazeia ba sira-nia aspirasaun ba líder iha Timor-Leste no ASEAN, sira-nia abilidade hodi estabelese relasaun serbisu transforteirisu, no sira-nia potensiál hodi kontribui ba área prioridade sira iha rai-laran. Kandidatu sira mos tenke-ser profisiente iha lian inglés iha nível serbisu, hodi nune’e bele kontribui ba iha diskusaun sira.
Iha programa ne’e, partisipante sira sei apreende barak kona-ba lideransa no ASEAN husi péritu nasionál no rejionál sira, no sei hetan esperiensia liuhusi vizita ba nasaun membru sira hodi dezenvolve relasaun no koñesimentu.
Jornalista : Antónia Gusmão
Editora : Julia Chatarina
