DILI, 04 abríl 2024 (TATOLI)—Autoridade Nasionál Komunikasaun (ANC,sigla portugés) rekolla ona reseita hamutuk $ 65.596,69 liuhusi ninia servisu sira, iha janeiru to’o marsu 2024.
“Durante fulan-tolu, hahú hosi janeiru to’o marsu 2024, pagamentu impostu ka taxa ne’ebé operadór telekomunikasaun sira hanesan Timor Telecom, Telemor no Telkomcel inklui Internet Service Provider (ISP) hamutuk $65.596,69,” Prezidente ANC, Flávio Neves, informa ba Agência Tatoli, iha ninia knaar fatin, Mercado-Lama, kinta ne’e.
Kada operadór no ISP selu taxa 2% husi sira-nia rendimentu ba ANC, nune’e bele kontribui mós ba reseita doméstika.
ANC iha tinan 2023 rekolla reseita $2.678.967,84 ba kofre Estadu, ne’ebé reseita sira ne’e maihusi operadór telekomunikasaun tolu hanesan Timor Telecom, Telemor no Telkomcel, inklui empreza ualu hanesan Gardamor ISP, Lda, Adapaun Metrolink, Lda, Raph Vision Electronic Unip, Lda, SacomTel, Lda, Marapido Net Unipessoal Lda, Apurva Unipessoal, Lda, Megtelco, Lda, no Kacific Broadband Satellite Unipessoal, Lda, ne’ebé oferese servisu internet.
Notísia relevante : ANC atribui lisensa espektru frekuénsia adisionál ba operadór telekomunikasaun tolu
ANC nu’udar autoridade legál ida ne’ebé estabelese liuhusi dekretu-lei númeru 15/2012 kona-ba regulamentu setór telekomunikasaun.
Autoridade ne’e nu’udar institutu públiku ho personalidade jurídika, ne’ebé iha autonomia administrativa no finanseira, iha orsamentu no patrimóniu própriu, ho objetivu atu ezerse funsaun hanesan entidade reguladora setór telekomunikasaun.
Jornalista : Arminda Fonseca
Editora : Julia Chatarina
