iklan

NASIONÁL, HEADLINE

Embaixada Austrália apela labele monu ba informasaun falsu kona-ba vistu serbisu

Embaixada Austrália apela labele monu ba informasaun falsu kona-ba vistu serbisu

Embaixada Austrália iha Dili. Imajen/Espesiál

DILI, 04 abríl 2024 (TATOLI)–Governu Austrália liuhusi Embaixada Austrália iha Dili-Timor-Leste apela ba públiku katak labele monu ba hoax ka informasaun falsu ne’ebé partilla hosi ajénsia rekrutamentu sira iha rede sosiál kona-ba vistu serbisu iha Austrália.

“Informasaun falsu barak maka partilla ona iha internet, ne’ebé oferese serbisu ka vistu ba Austrália. Ida-ne’e bain-bain oferese husi empregu sira-ne’ebé reklama sira-nia an hanesan ajénsia rekrutamentu ka konsultadór servisu imigrasaun nian. Embaixada Austrália rona ona kona-ba mensajen ne’ebé maka sirkula iha rede sosiál iha Dili, ne’ebé reklama atu liga aplikante sira ba sítiu ka fatin online ida-ne’ebé ema bele aplika ba vistu atu serbisu iha Austrália, inklui estudante sira-ne’ebé hakarak atu serbisu no estuda iha Austrália,” haktuir nota ne’ebé Agência Tatoli asesu husi pájina ofisiál Embaixada Austrália iha Dili, kinta ne’e.

Notísia relevante : SEFOPE klarifika matéria teste ba kandidatu traballadór Austrália kada munisípiu diferente

Aleinde ne’e, Reprezentante permanente Austrália iha Dili hakarak konfirma katak mensajen ida-ne’e la’ós husi Governu Austrália.

Austrália rasik iha sítiu ofisiál ba ema hotu atu aplika vistu bá Austrália liuhusi sítiu Departamentu ba Asuntu Interinu nian iha www.homeaffairs.gov.au.

Informasaun falsu kona-ba vistu ne’e bain-bain haruka ba ema sé de’it ho tinan, orijen, no nível rendimentu la hanesan. Austrália nia Departementu ba Asuntu Interinu nian fornese informasaun detallu kona-ba oinsá atu proteje-an husi fraude.

“Karik ita deskonfia ita monu ba fraude, labele fornese tan informasaun kle’an ka selu osan ba sítiu ka ema ne’ebé ita ko’alia kona-ba asuntu ne’e.

Karik hakarak halo keixa ba hoax imigrasaun ka operadór ilegál sira ne’e, bele kontaktu: Departementu ba Asuntu Interinu nia liña iha: https://www.homeaffairs.gov.au/…/online-forms/border-watch. Haruka email ba immigration.dili@dfat.gov.au.

Jornalista     : Antónia Gusmão

Editora         : Julia Chatarina

 

 

iklan
iklan

Leave a Reply

iklan
error: Content is protected !!