iklan

BAUCAU, HEADLINE, MUNISÍPIU, SAÚDE

Fundasaun Lafaek Diak apoia ai-moruk ba HorEX Baucau

Fundasaun Lafaek Diak apoia ai-moruk ba HorEX Baucau

Diretór Ezekutivu FLD, Constantino Pinto, konversa ho Xefe Departamentu Kualidade Kontrolu no Komunikasaun Sosiál HorEX Baucau, Mário Sarmento, bainhira entrega ai-moruk iha edifísiu FLD Triloka, kinta (04/04). Imajen Agência TATOLI/Natalino Belo.

BAUCAU, 04 abríl 2024 (TATOLI) – Fundasaun Lafaek Diak (FLD) apoia ai-moruk hamutuk item 29 ba Ospitál Referál Eduardo Ximenes (HorEX, sigla Portugés) munisípiu Baucau.

Diretór Ezekutivu Fundasaun Lafaek Diak (FLD), Constantino Pinto, esplika, ai-moruk ne’ebé apoia ba HorEX tanba enfrenta estoke out tanba parte rua iha relasaun serbisu liuliu ligada ho atendimentu saúde.

“Tuir informasaun ospitál agora difisil entaun apoia ida-ne’e atu ajuda hodi halo atendimentu ba komunidade iha HorEX,” Diretór ezekutivu FLD hateten iha Triloka, kinta ne’e.

Constantino Pinto, konsidera apoia ai-moruk ba HorEX bele hatán ba preokupasaun estoke out no utiliza halo atendimentu saúde ba pasiente sira-ne’ebé halo tratamentu iha fatin referidu.

Ai-moruk ne’e Fundasaun Lafaek Diak sosa hosi nasaun Olanda liuhosi distribuisaun iha Alemaña ne’ebé utiliza ba atividade médiku liuhosi programa mobile Klínika iha área rurál.

Xefe departamentu kualidade kontrolu no komunikasaun sosiál HorEX Baucau, Mário Sarmento, agradese ba FLD ne’ebé apoia ona ai-moruk ba HorEX tanba ajuda ai-moruk sira-ne’e urjente hodi atende ba komunidade ne’ebé halo tratamentu iha HorEX.

“Ajuda ida-ne’e bele suporta ami tanba ospitál kuandu menus ai-moruk parte jerente sira husu tulun ba parseiru sira,” nia agradese.

Hosi totál ai-moruk item 29 ne’ebé apoia ba HorEX Baucau komposta hosi amoxicilin mg 500 no mg 250 hamutuk rihun haat kapsul, bistoury hamutuk kaixa haat, canula kaixa tolu, cloxacilin sodium inject kaixa ida, folic acid hamutuk tableta rihun tolu no seluk tan.

Alende ne’e, Fundasaun Lafaek Diak apoia tan ekipamentu la’ós-médiku item rua hanesan Zinc oxide plester kaixa 30 no disposable scalpels sterile kaixa rua.

Notísia relevante: Medikamentu item 171 estoke out iha SAMES Baucau

Jornalista  : Natalino Belo

Editór        : Evaristo Soares Martins 

iklan
iklan

Leave a Reply

iklan
error: Content is protected !!