DILI, 04 abril 2024 (TATOLI)—Prezidente Komisaun F trata asuntu Saúde, Seguransa Sosiál no Igualidade Jeneru iha Parlamentu Nasionál (PN), Deputada Maria Gorumali Barreto, husu Hospital Nasionál Guido Valedares (HNGV, siglá portugés) atu solusiona bainhira akontese eletrisidade mate hodi labele prezudika atendimentu ba pasiente sira.
Notísia Relevante: MS tenke fó atensaun eletrisidade mate difikulta parteira fó partu ba inan isin-rua
Bazea ba fiskalizasaun komisaun F ninian ba iha HNGV no mós Orsamentu Jerál Estadu (OJE) kada tinan ne’ebé mak aloka ba HNGV no ospitál referál sira, iha HNGV rasik iha jeradór ne’ebé preparadu iha ne’eba, no bainhira ahí mate ne´e sira bele funsiona lalais tanba jeradór ne’ebé iha HNGV kompleta mós orsamentu aloka hodi sosa gazolina ho mós manutensaun.
“Ita ko’alia kona-ba eletrisidade ne’ebé mate (iha HNGV), buat hotu ita prepara. Agora, se iha HNGV mak ahí mate sira la uza jeradór, ida-ne’e mak ita presiza foti kestaun. Katak, problema ne’e iha ne’ebé, tanba jeradór iha, orsamentu ba sosa gazolina no manutensaun iha. Se orsamentu ida-ne’e la uza ne’e problema iha ida ne’ebé. Ida-ne’e ami mós foti kestaun buat ruma la’o la loos, iha ospitál ne’eba,” Prezidente Komisaun F ne’e hateten ba Agência Tatoli iha PN, kinta ne’e.
Nia husu Ministériu Saúde (MS) atu bele halo investigasaun iha HNGV, tanba orsamentu no jeradór iha tanbasá bainhira ahí mate la loke jeradór hodi bele atende lalais pasiente.
Tanba iha informasaun ne’ebé mak liuhusi mídia ne’ebé iha, ita mós triste bainhira pasiente ne’ebé mate tanba bainhira ahí mate labele hala’o kontinuasaun operasaun afeta ba pasiente mate, ida-ne’e triste boot.
Jornalista : Nelson de Sousa
Editór : Cancio Ximenes
