PM Xanana parabeniza PM Portugal Luís Montenegro

DILI, 04 abríl 2024 (TATOLI)-–Primeiru-Ministru (PM), Kay Rala Xanana Gusmão hato’o parabéns ba Primeiru-Ministru foun Portugal, Luís Montenegro, ne’ebé simu pose iha loron 02 Abríl 2024 hodi lidera XXIV Governu Konstitusionál.

“Exelénsia Primeiru-Ministru ho orgullu boot ha’u haruka karta ida-ne’e hodi kongratula ba tomada de posse XXIV Governu Konstitusionál ne’ebé lidera husi Vossa Exelénsia. Ita-boot nia nomeasaun atinje ho signifakante tebes no hanesan rekoñesementu husi ita-boot nia kompromisu no dedikasaun ba povu. Hodi Povu no Governu Repúblika Demokrátika Timor-Leste no hodi há’u-nia naran rasik, hakarak hato’o ha’u-nia felisitasaun ba Vossa Exelénsia no dezeju susesu boot iha kargu exelente ida-ne’e,” PM Xanana hato’o felisitasaun ne’e liuhusi karta mensajen ne’ebé haruka ba Primeiru-Ministru Repúblika Portugés, Luís Montenegro iha Lisboa, Portugal, loron 02 Abríl 2024.

Xefe Governu, aproveita oportunidade ne’e hodi manifesta no dezeju susesu ba Governu foun no espera katak sei hametin liután kooperasaun ho Governu Timor-Leste.

“Aproveita oportunidade ida-ne’e hodi manifesta ha’u-nia dezeju no disponibilidade serbisu iha konsolidasaun iha lasu históriku amizade, solidariedade no kooperasaun ne’ebé halo ita-nia povu sira unidade no ita-nia nasaun. Portugal hanesan nasaun referénsia ne’ebé mak sempre sai parseiru ne’ebé hamriik metin ho Timor-Leste, sempre fundamentál ba prosesu konstrusaun Estadu,” Xanana fundamenta.

Notísia relevante : Xanana no António Costa diskute planu kooperasaun tinan 2024-2028

Nia salienta, iha ámbitu ne’e mós iha relasaun ho Estadu seluk, partikularmente nasaun amigu sira iha komunidade sira ne’ebé ko’alia lian Portugés.

Xefe Governu fiar katak ho Governasaun Portugés lideradu Luís Montenegro hametin liután serbisu hamutuk iha área  defeza ne’ebé nia valór demokrátiku a’as tebes hodi halo promosaun ba interrese komum.

“Ha’u aprezenta ba Vossa Exelénsia, Primeiru-Ministru, votos prosperiedade ba Povo Portugés no ha’u espresa ha’u-nia konsiderasaun a’as,” Líder Karismátiku ne’e tenik.

Primeiru-Ministru, Luís Montenegro ho membru sira simu pose husi Prezidente Repúblika Portugal, Marcelo Rebelo de Sousa, iha loron 02 Abríl 2024, iha Palácio Nacional Lisboa, Portugal.

Xefe Governu Luís Montenegro ho nia kompozisaun membru Governu na’in-17, kompostu feto hitu no mane ho kargu hanesan Ministru Estadu no Negósiu Estranjeiru,  Paulo Rangel, Ministru Estadu no Finansa,  Joaquim Miranda Sarmento, Ministru Prezidénsia, António Leitão Amaro, Ministru Adjuntu no Koezaun Territorial, Manuel Castro Almeida, Ministru Asuntu Parlamentár, Pedro Duarte, Ministru Defesa Nasionál, Nuno Melo, Ministra da Justiça, Rita Judice, Ministru Administração Interna, Margarida Blasco, Ministru Edukasaun, Siénsia no Inovasaun, Fernando Alexandre, Ministra Saúde, Ana Paula Martins, Ministru  Infraestrutura no Abitasaun, Miguel Pinto Luz, Ministru Ekonomia, Pedro Reis, Ministra Traballu, Solidariedade no Seguransa Sosiál, Maria Do Rosário Palma Ramalho, Ministra Ambiente no Enerjia, Maria da Graça Carvalho, Ministra Juventude no Modernizasaun, Margarida Balseiro Lopes, Ministru Agricultura Pesca, José Manuel Fernandes, Ministra Cultura, Dalila Rodrigues.

Entretantu, kona-ba kargu Sekretáriu Estadu balun, tuir komunikadu imprensa hosi Palásiu Prezidénsia Portugal katak Xefe Estadu Marcelo Rebelo de Sousa sei fó simu pose iha loron 05 Abríl 2024.

Iha sorin seluk, Primeiru-Ministru, Kay Rala Xanana Gusmão hato’o agradese ba serbisu hamutuk ho antigu Primeiru-Ministru Portugal, António Costa, ne’ebé estabelese entre Governu Timor-Leste, antes ramata ninia mandatu.

PM Xanana mós agradese tebes ba vizita ofisiál  antigu Xefe Governu Portugal mai Timor-Leste iha loron 25 Jullu 2023, ne’ebé hatudu amizade forte entre nasaun rua ninia kooperasaun.

“Olá Querido Amigo! Di’ak ka lae? Espera selebrasaun páskua liubá la’o di’ak. Obrigada mós ba buat hotu, iha relasaun bilaterál Portugal ho Timor-Leste ne’ebé di’ak tebes. Dezeju buat hotu di’ak ba ita Dr. António nafatin sai amigu ba ami, no ita-boot, hakuak boot queridu amigu,” PM Xanana hato’o agradesementu bainhira dada-lia ho António Costa, via telefónika.

Jornalista     : Antónia Gusmão

Editora          : Julia Chatarina